एजेन्सी– इंग्ल्यान्डका युवा ब्याटर ओली पोपले पाकिस्तानसँग तीन टेस्ट खेलको सिरिज खेल्नुअघि अभ्यास खेलमा इंग्ल्यान्ड लायन्सविरुद्ध सानदार शतक हानेका छन् ।

युएईमा थ्री डेको अभ्यास खेलमा शेख जायद स्टेडियम आधुबाधीमा टस जितेर पहिला ब्याटिङ रोजेको इंग्ल्यान्डले पहिलो दिन ७९ ओभरमा ७ विकेट गुमाउँदै ५ सय १ रन बनाएको छ ।

युवा ब्याटर ओली पोपले १ सय २० बलमा २२ चौका र ३ छक्कासहित १ सय ४६ रनको सानदार शतकीय इनिङ खेले । ओली पोप इंग्ल्यान्डका बर्तमान समयका प्रमुख मध्यक्रमका ब्याटर हुन् । उनले अन्तर्राष्ट्रिय क्रिकेटमा सानदार प्रदर्शन गर्दै आएका छन् ।

त्यस्तै ओपनर ज्याक क्रली ८९ बलमा १५ चौका र १ छक्कासहित ९६ रनमा रन आउट भए । बेन डकेट २८, जो रुट ९, लियाम लिभिङस्टोन ३६ र बेन फोक्सले ४८ रन बनाए । सिमित ओभरका विष्फोटक ब्याटर लियाम लिभिङस्टोन पाकिस्तानविरुद्ध टेस्टमा डेब्यू गर्ने छन् ।

तल्लोक्रमका ब्याटर विल ज्याक्स ४८ बलमा १२ चौका र ४ छक्कासहित ८४ रनमा आउट भए । इंग्ल्यान्डका लायन्सका ड्यानिल लरेन्सले सर्वाधिक दुई विकेट लिए । पाकिस्तान र युएईको कन्डिसन मिल्ने हुँदा इंग्ल्यान्डले अभ्यास गरेको हो । इंग्ल्यान्ड आगमी शनिबार पाकिस्तान जानेछ ।

पाकिस्तान र इंग्ल्यान्डबीच पहिलो टेस्ट खेल १ डिसेम्बरमा रावलपिन्डी क्रिकेट स्टेडियममा हुनेछ । दोस्रो टेस्ट ९ डिसेम्बरदेखि मुल्तान क्रिकेट स्टेडियम र तेस्रो टेस्ट १७ डिसेम्बर देखि कराँचीमा सुरु हुनेछ । विश्वकप अघि इंग्ल्यान्डले पाकिस्तानमा गएर सात टि२० आई खेलको सिरिज खेलेको थियो । उक्त सिरिज इंग्ल्यान्डले ४–३ ले जितेको थियो ।

इंग्ल्यान्डको टेस्ट टोली :

बेन स्टोक्स (कप्तान), जेम्स एन्डरसन, ह्यारी ब्रुक, ज्याक क्रली, बेन डकेट, बेन फोक्स, विज ज्याक्स, केटन जेनिङ्सन, ज्याक लेच, लियाम लिभिङस्टोन, जेम्स ओभरटन, ओली पोप, ओली रोविन्सन, जो रुट र मार्क वुड ।