एजेन्सी – विश्व क्रिकेटका उत्कृष्ट तीव्र गतिका बलर जोफ्रा आर्चर लामो समयपछि मैदान फर्किएका छन् । लगातार चोटका कारण मैदान बाहिर हुँदै आएका आर्चर आबुधाबीमा थ्री डे वार्मअप खेलमा इंग्ल्यान्ड लायन्सबाट इंग्ल्यान्डविरुद्ध पूनरागमन गरेका छन् ।

योसँगै आर्चर मैदान फर्किने लामो प्रतिक्षा पनि अन्त्य भएको छ । थ्री डेको अभ्यास खेलमा आर्चरले पहिलो दिन ९ ओभरमा १ मेडन राख्दै ३८ रन खर्चे ।

युएईको शेख जायद स्टेडियम आधुबाधीमा टस जितेर पहिला ब्याटिङ रोजेको इंग्ल्यान्डले पहिलो दिन ७९ ओभरमा ७ विकेट गुमाउँदै ५ सय १ रन बनाएको छ । युवा ब्याटर ओली पोपले १ सय २० बलमा २२ चौका र ३ छक्कासहित १ सय ४६ रनको सानदार शतकीय इनिङ खेलेका थिए ।

आर्चर पछिल्लो पटक २०२१ जुलाईमा घरेलु क्रिकेट खेलेका थिए । उक्त घरेलु क्रिकेट खेल्नेक्रममा दायाँ हातको कुइनोमा चोट लागेपछि डेढ वर्ष मैदान बाहिर रहनु परेको हो । अन्तर्राष्ट्रिय क्रिकेट भने २०२१ मार्चमा भारतविरुद्ध खेलेका थिए । त्यसपछि इंग्ल्यान्डले दुई टि२० विश्वकप खेल्दा आर्चर मैदान बाहिर रहनु पर्यो ।

गत वर्ष टि२० विश्वकपमा इंग्ल्यान्ड सेमिफाइनलमा न्युजिल्यान्डसँग पराजित हुँदै बाहिरियो । आर्चरको अभाव इंग्ल्यान्डको टोलीलाई निकै खड्किएको थियो । डेथ ओभरमा अन्तिम तीन ओभरमा ५७ रन खर्चिदै उपाधि दाबेदार इंग्ल्यान्ड सेमिफाइनलबाटै बाहिरिनु परेको थियो । अघिल्लो साता इंग्ल्यान्डले पाकिस्तानलाई हराउँदै टि२० विश्वकप उपाधि जितेको थियो । यो पटक डेथ ओभरमा साम करनले सानदार प्रदर्शन गर्दै उनको अभाव महसुस हुन दिएनन् ।

आर्चर बाउन्स र योर्करका लागि चिनिन्छन् । साथै उनको तीव्र गतिको बल खेल्न कुनैपनि ब्याटरलाई सहज हुँदैन । उनी १ सय ५५ प्रतिघण्टा किलोमिटरको गतीमा बलिङ गर्ने क्षमता भएका बलर हुन् । ब्याटिङमा उनी हिटरको रुपमा चिनिन्छन् । आर्चरलाई बर्तमान समयका बाउन्सर किंग पनि भनिन्छ । २०१९ को एकदिवसिय विश्वकपमा बंगलादेशविरुद्ध उनले सौम्य सरकारलाई बोल्ड गरेको बल स्टम्पमा लागेर सिधैं बाउन्ड्री बाहिर गएको थियो ।

सन् २०१९ मा इंग्ल्यान्डलाई एकदिवसिय विश्वकप जिताउन आर्चरको प्रदर्शन सानदार थियो । न्युजिल्यान्डलाई सुपर ओभरमा बराबरीमा रोक्दै बाउन्ड्री काउन्टको आधारमा विश्वकप जिताउन आर्चर नायक बनेका थिए ।

विश्वकप प्रतियोगिताभर उत्कृष्ट बलिङका साथ ११ खेलमा २० विकेट लिएका थिए । आर्चरले इंग्ल्यान्डबाट १३ टेस्ट, १७ ओडिआई र १२ टि२० आई खेलेका छन् । सिमित ओभरमा डेथ ओभरका स्पेलिष्ट रुपमा समेत चिनिन्छन् ।

गत वर्ष आइपिएल मेगा अक्सनमा मुम्बईले आर्चरलाई ८ करोड भारुमा किनेको थियो । त्यस सिजन उनी नखेल्ने भएपनि २०२३ को लागि टोलीमा राखि राख्न सनराइजर्स हैदराबाद, राजस्थान रोयल्स र मुम्बई इन्डियन्सबीच कडा प्रतिस्पर्धा भएको थियो । मुम्बईमा जस्प्रित बुमराह र जोफ्रा आर्चरको दुई जोडीको प्रदर्शन अझ हेर्न लायक हुनेछ ।

दुबै बलर चोटबाट फर्किनेछन् । आर्चरको पूनरागमनले इंग्ल्यान्डको बलिङ आक्रामण निकै मजबुत हुनेछ । आर्चर पाकिस्तानसँग हुने तीन टेस्ट खेलको सिरिजको लागि भने टोलीमा छैनन् । उनी मैदान फर्किए पनि अन्तर्राष्ट्रिय क्रिकेटमा पूनरागमन गर्न अझै केहि समय लाग्ने देखिन्छ ।