काठमाडौं (हाम्रो खेलकुद) – खराब सुरुवात गरेपनि कप्तान रोहित पौडेलले अर्धशतक प्रहार गरेपछि नेपालले पहिलो एकदिवसिय अभ्यास खेलमा दिल्ली डिस्टिक जिल्ला एसोसियनसनविरुद्ध सम्हाल्लिएको छ ।

टस जितेर पहिला ब्याटिङ थालेको नेपालले ३० ओभरमा ४ विकेट गुमाउँदै १ सय २० रन बनाएको छ । कप्तान रोहित पौडेल ९४ बल खेल्दै ६५ रनमा क्रिजमा छन् । उनलाई कुशल भुर्तेलले ३४ बलमा १९ रन बनाउँदै साथ दिएका छन् ।

नेपालको सुरुवात भने सम्झन लायक रहेन । शीर्ष तीन ब्याटर खाता खोल्न नसकी आउट भएको अवस्थामा रोहितले कप्तानी जिम्मेवारी लिँदै महत्वपूर्ण अर्धशतक प्रहार गरेका हुन् ।

नेपालका ओपनर अर्जुन साउद, आसिफ शेख र ज्ञानेन्द्र मल्ल तीनै ब्याटर डक आउट भएका छन् । अर्जुनले ८, आसिफले २ र ज्ञानेन्द्रले ५ बल खेल्दा खाता खोल्न सकेनन् । नेपालले आइसिसी विश्वकप लिग २ अन्तर्गत नामिबिया भ्रमण अघि भारतमा अभ्यास खेलेको हो । नेपालले शुक्रबार दिल्लीसँगनै दोस्रो अभ्यास खेल खेल्नेछ । आइतबार नामिबिया प्रस्थान गर्नेछ ।

यो अभ्यास खेल हुँदा नेपालको १४ जना भित्र रहेका जो सुकै खेलाडीलाई खेलाउन सक्छ । अन्तर्राष्ट्रिय खेलमा जस्तो प्लेइङ ११ नै खेल्ने भन्ने हुँदैन ।

नेपालको टोली :

रोहित पौडेल (कप्तान), आसिफ शेख, दीपेन्द्रसिंह ऐरी, कुशल भुर्तेल, ललित राजवंशी, सोमपाल कामी, सागर ढकाल, अर्जुन साउद, ज्ञानेन्द्र मल्ल, आरिफ शेख, गुलशन झा, करण केसी, हरिशंकर शाह र नन्दन यादव ।