काठमाडौं (हाम्रो खेलकुद) – तीव्र गतिका बलर किशोर महतो र स्पिनर भुवन कार्कीको उत्कृष्ट बलिङमा नेपाल एपिएफ क्लबले सगरमाथा टि२० कपमा घरेलु टोली प्रदेश एकलाई ८ विकेटले हराउँदै लगातार दोस्रो जित हात पारेको छ ।

जितको लागि ९८ रनको विजयी लक्ष्य पछ्याएको एपिएफले ११.५ ओभरमा २ विकेट गुमाउँदै पूरा गर्यो । एपिएफको जितमा ओपनर प्रदीप ऐरीले २९ बलमा ३ चौकासहित सर्वाधिक ३३ रन बनाए ।

आयुषमान बमले २२ बलमा ४ चौकासहित २८, लोकेश बम २० र सन्दीप जोराले १४ रन बनाए । लोकेशले १३ बलमा २ छक्का हाने । सन्दीप जोराले ७ बलमा १ चौका र १ छक्का हाने । प्रदेश एकका श्रवण यादवले २ ओभरमा १५ रन खर्चेर १ विकेट लिए ।

त्यसअघि विराटनगरको बैजनाथपुरमा टस हारेर ब्याटिङको निम्तो पाएको प्रदेश एकले निर्धारित १३ ओभरमा ९ विकेट गुमाउँदै ९७ रन बनायो । प्रदेश एकका अंकित सुवेदीले ११ बलमा २ चौका र २ छक्कासहित सर्वाधिक २४ रन बनाए । कप्तान सिद्धान्त लोहनीले १६ बलमा १ चौका र १ छक्कासहित १६, निरज मुखिया १५, दीपक पासवान २, शुभनकर उरायोले १७ रन बनाए ।

एपिएफका किशोर महतोले ३ ओभरमा ३२ रन खर्चेर ३ विकेट लिए । भुवन कार्कीले ३ ओभरमा १४ रन खर्चेर ३ विकेट लिए । विपिन खत्री र अमरसिंह राउटेलाले एक एक विकेट लिए । एपिएफले पहिलो खेलमा आर्मीलाई २ विकेटले हराएको थियो । प्रदेश एकले पुलिसलाई ७ विकेटले हराएको थियो ।

प्रदेश एकले आयोजना गरेको सगरमाथा कपमा तीन विभागी टोली, भारतका दुई टोली इस्ट सेन्ट्रल रेलवे र ध्रुब क्रिकेट एकेडेमी गरि कुल ६ टोली छन् ।