एजेन्सी– शीर्षक्रमका तीन ब्याटरको अर्धशतकमा भारतले पहिलो ओडिआई खेलमा घरेलु टोली न्युजिल्यान्डलाई ३ सय ७ रनको बलियो लक्ष्य दिएको छ । इडेन पार्क अकल्यान्डमा टस हारेर पहिला ब्याटिङको निम्तो पाएको भारतले निर्धारित ५० ओभरमा ७ विकेट गुमाउँदै ३ सय ६ रन बनायो ।

भारतका श्रेयस ऐरले ७६ बलमा ४ चौका र ४ छक्कासहित सर्वाधिक ८० रनको योगदान दिए । भारतलाई ओपनर शुभमन गिल र कप्तान शिखर धवनले पहिलो विकेटका लागि २३.१ ओभरमा १ सय २४ रनको शतकीय साझेदारी गर्दै उत्कृष्ट सुरुवात दिलाएका थिए ।

लोकी फर्गुसनको बलमा गिल डेभन कन्वेबाट क्याच भएपछि साझेदारी तोडिएको थियो । शिखर धवन ७७ बलमा १३ चौकासहित ७२ रनमा आउट भए । धवन गिल आउट भएको अर्को ओभरमा टिम साउथीको बलमा फिन एलेनबाट क्याच आउट भएका थिए ।

लोकी फर्गुसनले ऋषभ पन्तलाई १५ रनमा बोल्ड गरे । सूर्यकुमार यादव फर्गुसनको बलमा ४ रनमा क्याच भएपछि भारत १६०–४ को अवस्थामा पुगेको थियो । पाँचौं विकेटका लागि श्रेयस र स्यामसनले ९४ रनको साझेदारी गर्दै भारतको धरमराएको इनिङ उकासेका थिए ।

स्यामसन ३८ बलमा ४ चौकासहित ३६ रनमा क्याच आउट भए । वासिन्टन सुन्दर १६ बलमा ३ चौका र ३ छक्कासहित ३७ रनमा अविजित रहे ।

न्युजिल्यान्डका लोकी फर्गुसनले १० ओभरमा १ मेडनसहित ५९ रन खर्चेर ३ विकेट लिए । टिम साउथीले १० ओभरमा ७३ रन खर्चेर ३ विकेट लिए । एडम मिल्नेले एक विकेट लिए ।