काठमाडौं (हाम्रो खेलकुद) – नेपालका अनुभवी खेलाडी ज्ञानेन्द्र मल्लले आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली नामिबियाविरुद्ध उत्कृष्ट प्रदर्शन गरेका छन् ।

ज्ञानेन्द्र नामिबियाविरुद्ध ९४ बलमा ७ चौका र २ छक्कासहित सर्वाधिक ७५ रनमा आउट भए । ज्ञानेन्द्र तीव्र गतिका बलर टांगेनी लंगामेनीको बलमा एज लागेर विकेटकिपर जानी ग्रीनबाट क्याच आउट भए । ज्ञानेन्द्रको यो ओडिआई करिअरको छैटौं अर्धशतक हो ।

ज्ञानेन्द्र नेपालबाट ओडिआईमा सर्वाधिक ६ अर्धशतक बनाउने पहिलो खेलाडी हुन् । ज्ञानेन्द्रपछि नेपालबाट आसिफ शेख र रोहित पौडेलले ५–५ अर्धशतक प्रहार गरेका छन् ।

यो ज्ञानेन्द्रको ओडिआई करिअरको उच्च प्रदर्शन हो । ज्ञानेन्द्रले दुई साताअघि युएईसँग तेस्रो ओडिआई खेलमा घरेलु मैदान टियुमा ६४ रनको इनिङ खेलेका थिए । त्यो नै उच्च प्रदर्शन थियो । ज्ञानेन्द्र ओडिआईमा नेपालबाट पहिलो अर्धशतक हान्ने खेलाडी हुन् ।

ज्ञानेन्द्रले नेपालको ओडिआई डेब्यू खेलमा २०१८ मा नेदरल्यान्ड्सविरुद्ध ५१ रनको इनिङ खेलेका थिए । २०२० को फेब्रुअरीमा ज्ञानेन्द्रले टियु मैदानमा ओमानविरुद्ध ५६ रन जोडेका थिए । गतवर्ष अल अमरेतमा अमेरिकाविरुद्ध ५५ र ओमानविरुद्ध ५२ रनको लगातार अर्धशतकीय इनिङ खेलेका थिए ।