काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा नेपाल स्कटल्यान्डसँग तीन विकेटले पराजित हुन पुग्यो । जितको लागि १ सय ३८ रनको विजयी लक्ष्य पछ्याएको स्कटल्यान्डले ३२.१ ओभरमा ७ विकेट गुमाउँदै पूरा गर्यो ।

नेपालका सागर ढकाल, ललित नारायण राजवंशी र गुलशन झाले दुई दई विकेट लिए । त्यसअघि नामिबियाको युनाइटेड क्रिकेट क्लब ग्राउन्ड विन्डहोकमा टस हारेर पहिला ब्याटिङको निम्तो पाएको नेपाल ४०.१ ओभरमा १ सय ३७ रनमा अल आउट भयो । नेपालका गुलशन झाले २९ बलमा ३ चौका र १ छक्कासहित सर्वाधिक २९ रन बनाए ।ज्ञानेन्द्र मल्ल ३९ बलमा ३ चौकासहित २५ रनमा आउट भए ।

नेपालले अव बुधबार नामिबिया र बिहीबार स्कटल्यान्डसँग खेल्नेछ । नेपालले स्कटल्यान्डसँग हार्नुमा खेलाडीसँगै प्रशिक्षक, कप्तान र टिम म्यानेजमेन्ट सबैको ठूलो गल्ती छ । नेपालको हारका प्रमुख पाँच कारण यस प्रकार छन् ।

५.दबाब र कन्डिसन अनुसार खेल्न नसक्नु

नेपालको प्लेइङ–११ मा नौं नम्बर सम्म ब्याटिङक्रम छ । तर प्रदर्शन चाहिँ ५–६ नम्बरमा निर्भर भएजस्तो छ । नेपालका कुनैपनि ब्याटर दबाबमा खुलेर खेल्न सेकनन् । क्रिजमा जमेर धैर्यता देखाउन सकेनन् ।

लगातार विकेट गुम्दा एउटा राम्रो साझेदारीको आवश्यक पर्दछ । जुन नेपाली ब्याटरमा देखिएन । खराब प्रदर्शनपछि खेलमा फर्किने आधार नै एउटा राम्रो साझेदारी हो । त्यसतर्फ कुनैपनि ब्याटरले ध्यान दिएनन् ।

अर्कोतर्फ नेपाली ब्याटरले कन्डिसन अनुसार खेल्न सकेका छैनन् । इंग्लिस कन्डिसन एसियन टोलीका लागि सधैं कठिन मानिन्छ । जे जस्तो भएपनि ब्याटरहरु कन्डिसन अनुसार रन बनाउन सक्नुपर्छ । पिच र विपक्षीलाई बुझेर रन बनाउन सकेमात्रै राम्रो योगफलमा पुग्न सकिन्छ । तर नेपालबाट त्यस्तो हुन सकेन ।

४.अर्जुनको रन आउट

क्रिकेटमा रन आउट सधैं घातक बन्छ । दोस्रो विकेटका लागि अर्जुन साउद र ज्ञानेन्द्र मल्लले ३७ रनको साझेदारी गर्दै खेलमा फर्किने सम्भावना देखाएका थिए ।

क्रिजमा केहि समय लिएपछि रनको गति बढ्न थालेकोे थियो । तर एक रन लिनेक्रममा अर्जुन साउद कप्तान रिची बेरिङ्टनको थ्रोमा विकेटकिपर म्याथ्यु क्रसबाट रन आउट भए ।

अर्जुन रन आउट हुनुअघि नेपाल ४४–१ को अवस्थामा थियो । अर्जुन र ज्ञानेन्द्र दुबैले मैदान र विपक्षी बलरबारे राम्रोसँग बुझेका थिए । यी दुई खेलाडीले एउटा राम्रो साझेदारी गर्दा खेलमा नेपाल हाबी हुन सक्थ्यो । राम्रो साझेदारीले अन्य ब्याटर खुलेर खेल्न सक्थें । तर कुशल समयमा अर्जुन रन आउट भए ।

स्कटल्यान्डका बलर विकेट लिन नसकी रहेको अवस्थामा रन आउट हुनु ठूलो भारी पर्यो । त्यसैले नेपाल ४४-१ बाट ८३-६ को दयनीय अवस्थामा पुगेको थियो । सेट भई सकेको अवस्थामा रन आउट हुनु हारको एक कारण हो । त्यो पिचमा नयाँ ब्याटरलाई खेल्न सहज देखिदैन ।

३. एकै ओभरमा लगातार दुई विकेट जानु

एक समय नेपाल २३ ओभरमा ८०–३ को अवस्थामा थियो । प्राय नेपाली क्रिकेटको सुरुवात यस्तै हुने गर्दछ । यो अवस्थामा नेपाललाई एउटा राम्रो साझेदारीको आवश्यक थियो । क्रिजमा आरिफ शेख र रोहित पौडेल थिए । प्रमुख ब्याटर कुशल भुर्तेल र दीपेन्द्रसिंह ऐरी आउनै बाँकी थियो ।

तर तीव्र गतिका बलर क्रिस सोलले २४ औं ओभरको सुरुवाती दुई बलमा लगातार विकेट लिँदै स्कटल्यान्डको जितको टर्निङ प्वाइन्ट बनाए । सोलको २४ औं ओभरको पहिलो बलमा आरिफ शेख एज लागेर विकेटकिपर म्याथ्यु क्रसबाट आउट भए ।

लगत्तै अर्को बलमा कुशल भुर्तेल गोल्डेन डक पेभेलिएन फर्के । लगतार दुई विकेटले खेलको पुरै मोमेन्ट स्कटल्यान्डको पक्षमा गयो । स्कटल्यान्डको खेलाडीको मनोबल उच्च हुँदा अन्य नेपाली ब्याटर थप दबाबमा परे । नेपाल सस्तैमा अल आउट भयो । जुन योगफल बलरहरुको लागि पर्याप्त थिएन ।

२.खराब ब्याटिङ

ब्याटिङमा नेपालको कुनैपनि खेलाडीले ३० रन कटाउन सकेनन् । नेपालले ७ प्रमुख ब्याटर मैदान उतारेको थियो । करण र गुलशन अलराउन्डर हुँदा नौं विकल्प थिए ।

तर प्रमुख तीन ब्याटर आसिफ शेख ७, कुशल भुर्तेल गोल्डेन डक र दीपेन्द्रसिंह ऐरी ९ रनमा आउट भए । अर्जुन साउद १८, ज्ञानेन्द्र मल्ल २५, रोहित पौडेल १७ र आरिफ शेख १० रनमा आउट भए ।

नेपालको कुनैपनि ब्याटरको प्रदर्शन सम्झन लायक रहेन । सबै ब्याटरले खराब प्रदर्शन गरे । ओडिआई खेलमा दुई वा तीन खेलाडीले उत्कृष्ट प्रदर्शन गर्नुपर्छ । ती खेलाडीलाई अन्यले साथ दिनुपर्छ ।

तर नेपालको तर्फबाट कुनैपनि खेलाडीले राम्रो प्रदर्शन गर्न सकेनन् । खराब सट छनोट, धैर्यताको कमी र डट बलको समस्याले लगातार विकेट गुमाउन पुग्यो ।

१. भद्रगोल ब्याटिङक्रम

नेपालले खराब ब्याटिङ गर्नुको मुख्य कारण नै भद्रागोल ब्याटिङक्रम हो । यो हारको जिम्मेवारी खेलाडीसँगै प्रशिक्षक, कप्तान र टिम म्यानेजमेन्टले लिनुपर्छ । नेपालले ओपनरमा आसिफ शेख र अर्जुन साउदलाई निरन्तरता दियो । यी दुई ओपनर पुन असफल भए । प्रमुख ओपनर कुशल भुर्तेललाई छैटौं नम्बरमा खेलायो ।

ओपनरलाई फिनिसर र फिनिसरलाई ओपनरमा खेलाएको थियो । कुशल पावर प्ले राम्रो खेल्ने गर्दछन् । अर्जुन लगातार संघर्ष गर्दै आएका छन् । अर्जुन ओपनर भन्दा मध्यक्रम र तल्लोक्रममा तुलनात्मक रुपमा धेरै राम्रो खेल्ने गर्दछन् । नेपाली टोलीमा पर्नुअघि उनी घरेलु क्रिकेटमा मध्यक्रममै ब्याटिङ गर्दै आएका थिए ।

तेस्रो नम्बरमा ज्ञानेन्द्र र चौथो नम्बरमा रोहित पौडेललाई मैदान उतारेको थियो । यसअघि छैटौं नम्बरमा ब्याटिङ गर्ने आरिफ शेखलाई नामिबियामा दुबै खेलमा पाँचौं नम्बरमा मैदान उतार्यो । प्रमुख दुई ब्याटरलाई नेपालले छैटौं र सातौं नम्बरमा खेलाएको थियो । प्रमुख खेलाडी जहिले पनि शीर्ष चार भित्र मैदान उतार्नु पर्छ ।

चौथो नम्बरमा ब्याटिङ गर्दै आएका दीपेन्द्रलाई सातौं नम्बरमा खेलाउने निर्णय आफैंमा लज्जास्पद थियो । नेपालको टोलीमा ब्याटिङक्रम नै मिलेको छैन । भद्रागोल ब्याटिङक्रम छ । प्रशिक्षकले आफूलाई जहाँ मन लाग्यो खेलाडीलाई त्यहिँ खेलाएका छन् । कुशल र दीपेन्द्रलाई फिनिसर बनाउन भन्दा त बरु आदिल अन्सारीलाई टिममा लगएर गएको उत्कृष्ट हुन्थ्यो ।

कुनैपनि खेलाडीको ब्याटिङक्रम परिवर्तनसँगै प्रदर्शनमा असर पर्छ । ब्याटिङक्रम अनुसार प्रदर्शन गर्नुपर्ने हुन्छ । त्यसको लागि भिन्दै तयारी र योजना बनाउनु पर्ने हुन्छ । नेपालको हारको मुख्य कारण भद्रगोल ब्याटिङक्रम हो । यो सुधार विना राम्रो प्रदर्शन हुन कठिन देखिन्छ । अर्कोतर्फ नेपालले दुई स्पिनर मैदान उतारेको छ ।

नामिबियाको पिच तीव्र गतिका बलरलाई बढी फाइदाजनक हुन्छ । सोमपाल कामीलाई बेन्चमा राख्नु आफैंमा आश्चर्य छ । नेपालको प्लेइङ ११ सन्तुलित बनाउन आवश्यक पर्दछ ।