एजेन्सी – इन्डियन प्रिमियर लिग (आइपिएल) २०२३ को मिनी अक्सनमा इंग्ल्यान्डका साम करनले इतिहासकै सर्वाधिक मूल्य पाएका छन् । टि२० विश्वकप विजेता साम करनलाई पन्जाब किंग्सले १८ करोड ५० लाख भारुमा किन्यो ।

यसअघि कुनैपनि विदेशी खेलाडीले १७ करोडमाथि भारु पाउन सकेका थिएनन् । टि२० विश्वकप जिताउन सानदार प्रदर्शन गरेका अलराउन्डर साम करनलाई किन्न अक्सनमा चार टोलीबीच कडा प्रतिस्पर्धा भएपछि इतिहासकै महँगो मूल्य पाएका हुन् । यस पटक अक्सनमा सर्वाधिक मूल्य पाउने पाँच मध्य तीन इंग्ल्यान्डकै खेलाडी छन् ।

टि२० विश्वकप विजेता इंग्ल्यान्डका तीन खेलाडीमाथि अक्सनमा पैसाका वर्षा भयो । यस अक्सनमा दुई युवा अलराउन्डरले आइपिएल इतिहासकै सर्वाधिक महँगो मूल्य पाउनेक्रममा १७ करोडमाथि भारु पाएका छन् । २०२३ आइपिएलमा सर्वाधिक महँगो मूल्यमा बिक्ने पाँच खेलाडी यस प्रकार छन् ।

५.ह्यारी ब्रुक- १३ करोड २५ लाख भारु

इंग्ल्यान्डका युवा ब्याटर ह्यारी ब्रुकलाई सनराइजर्स हैदराबादले १३ करोड २५ लाख भारुमा अनुबन्ध गर्यो । पहिलो आइपिएल अक्सनमै मध्यक्रमका भरपर्दा ब्याटर ब्रुकलाई हैदराबादले महँगो मूल्य खर्चिएको हो ।

२३ वर्षीय ब्रुकले न्यूनतम मूल्य १ करोड ५० लाख भारु राखेका थिए । ह्यारी ब्रुकलाई किन्न रोयल च्यालेन्जर्स बेंगलोर, राजस्थान रोयल्स र सनराइजर्स हैदराबादबीच चर्को प्रतिस्पर्धा भएपछि महँगो मूल्य पाए। टि२० विश्वकप च्याम्पियन ह्यारी युवा पुस्ताका तीनै शैलीमा सानदार प्रदर्शन गर्दै आएका छन् ।

उनलाई इंग्ल्यान्डका पूर्व कप्तान केभिन पिटरसन र भारतीय विराट कोहलीसँग तुलना गर्ने गरिन्छ। मध्यक्रमका भरपर्दा ब्याट ब्रुक आक्रामक ब्याटिङ गर्ने गर्दछन् । २३ वर्षीय उनले २० खेलमा ३ सय ७२ रन बनाएका छन् । गत अक्टोबरमा पाकिस्तानसँग सात टि२० आई खेलको सिरिजमा २ सय ३८ रन बनाउँदै प्लेयर अफ द सिरिज बनेका थिए ।

पाकिस्तानसँगको जारी टेस्ट सिरिजमा उनले क्रमश : १५३, ८७, ९, १ सय ८ र १ सय ११ रनमा आउट भएका थिए । १ सय ५३ रनको इनिङ खेल्नेक्रममा उनले एकै ओभरमा छ बलमा ६ चौका हानेका थिए ।

ब्रुक मध्यक्रममा राम्रो ब्याटिङ गर्ने गर्दछन् । मध्यक्रममा स्पिन उनले झनै राम्रो खेल्ने गर्दछन् । अग्ला कदका ब्रुक मध्यक्रमका भरपर्दा ब्याटर हुँदा हैदराबादले करोडौं मूल्य खर्चिएको हो ।

४.निकोलस पुरन- १६ करोड भारु

वेस्टइन्डिजका विकेटकिपर ब्याटर निकोलस पुरनलाई लखनउ सुपर जायन्ट्सले १६ करोड भारुमा किन्यो । टोलीमा क्विन्टन डि कक र लोकेश राहुल विकेटकिपरको रुपमा रहेपनि मध्यक्रमको ब्याटरको लागि महँगो मूल्य खर्चिएको हो ।

सनराइजर्स हैदराबादले फुकुवा गरेको आक्रामक ब्याटर पुरनलाई किन्न अक्सनमा लखनउ, राजस्थान, मुम्बई र चेन्नईबीच प्रतिस्पर्धा भएको थियो । २ करोड न्यूनतम मूल्य राखेका पुरनलाई चेन्नईले ३ करोड २० लाखपछि बोली लगाउन छाडेको थियो । लखनउ ७ करोड २० लाखपछि मूल्य लगाउन सुरु गरेको थियो ।

त्यसपछि दिल्ली र लखउनबीच कडा प्रतिस्पर्धा भएको थियो । आइपिएल इतिहासमा विकेटकिपरको रुपमा सर्वाधिक मूल्य गतवर्ष मुम्बई इन्डियन्सले ईशान किशनलाई १५ करोड २५ लाख भारुमा किनेको थियो ।

वेस्टइन्डिजका विकेटकिपर निकोलस पुरन आक्रामक ब्याटरको रुपमा चिनिन्छन् । पुरनलाई सनराइजर्स हैदराबादले १० करोड ७५ लाख भारुमा अनुबन्ध गरेको थियो । पुरनलाई २०१७ मा मुम्बईले न्यूनतम ३० लाख भारुमा किनेको थियो । २०१९ देखि २०२१ सम्म पन्जाब सुपर किंग्समा ४ करोड २० लाख भारुमा खेलेका थिए ।

अघिल्लो हप्ता सम्पन्न आवुधाबी टि१० लिगमा सानदार प्रदर्शन गर्दै १० खेलमा ३ मा अर्धशतकसहित २३४.६९ को स्ट्राइकरेटमा ३ सय ४५ रन बनाएका थिए ।

टि२० विश्वकपमा सम्झन लायक प्रदर्शन गर्न नसकेपनि पुरनले पुन टि१० मा आफ्नो लय फर्काएपछि धनको वर्षा भएको हो । विश्वकपमा पहिलो चरणबाटै बाहिरिएपछि पुरनले कप्तानी छाडेका छन् । पुरनले वेस्टइन्डिजबाट ५२ ओडिआई र ७२ टि२० आई खेल खेलेका छन् ।

३.बेन स्टोक्स-१६ करोड २५ लाख

इंग्ल्यान्डका सुपर स्टार अलराउन्डर बेन स्टोक्सलाई चेन्नई सुपर किंग्सले १६ करोड २५ लाख भारुमा अनुबन्ध गरेको छ । चेन्नईले धोनीपछिको कप्तानको रुपमा बेन स्टोक्सलाई महँगो मूल्य खर्चिएको हो । स्टोक्स ब्याटिङ, बलिङ, फिल्डिङ र कप्तानी चारै क्षेत्रमा अब्बल खेलाडी हुन् । बेन स्टोक्स टोलीलाई जे चाहिँयो त्यहिँ गुण भएका खेलाडी हुन् । त्यसैले उनीमाथि महँगो मूल्य खर्चिएको हो ।

बेन स्टोक्सलाई २०१७ को अक्सनमा राइजिङ पुणे सुपर जायन्ट्सले १४ करोड ५० लाख भारुमा अनुबन्ध गरेको थियो । जुन उनले आइपिएलमा पाएको सर्वाधिक मूल्य थियो । बेन स्टोक्सलाई २०१८ मा राजस्थान रोयल्सले १२ करोड ५० लाख भारुमा किनेको थियो । न्यूनतम मूल्य २ करोड राखेका स्टोक्सलाई किन्न त्यस अक्सनमा चेन्नई, राजस्थान रोयल्स, रोयल च्यालेन्जर्स बेंगलोर, सनराइजर्स हैदराबाद र लखनउबीच प्रतिस्पर्धा भएको थियो ।

स्टोक्सले गतवर्ष आइपिएल खेलेनन् । बुबाको मृत्युपछि उनले अन्तर्राष्ट्रिय क्रिकेटबाट नै विश्राम लिएका थिए । त्यसैको कारण टि२० विश्वकप समेत खेलेका थिएनन् । बेन स्टोक्सले ४३ आइपिएल खेलमा २ शतकसहित कुल ९ सय २० रन बनाउनुको साथै २८ विकेट लिएका छन् ।

२०२० को आइपिएलमा राजस्थान रोयल्सले मुम्बईविरुद्ध १ सय ९६ रनको विजयी लक्ष्य पछ्याउनेक्रममा बेन स्टोक्सले १ सय ७ रनको सानदार शतकीय इनिङ खेलेका थिए । २०१७ मा पुणेबाट गुजरातविरुद्ध १ सय ३ रनको शतकीय इनिङ खेलेका थिए । दुई महिनअघि इंग्ल्यान्डलाई टि२० विश्वकप उपाधि जिताउन बेन स्टोक्सले सानदार प्रदर्शन गरेका थिए ।

फाइनलमा पाकिस्तानविरुद्ध स्टोक्सले ५२ रनको अविजित परिपक्क प्रदर्शन गर्दै उपाधि पक्का गराएका थिए । २०१९ को एकदिवसीय विश्वकप उपाधि जित्न बेन स्टोक्सले सानदार प्रदर्शन गरेका थिए ।

२.क्यामरन ग्रीन- १७ करोड ५० लाख भारु

अष्ट्रेलिया युवा अलराउन्डर क्यामरन ग्रीनलाई पाँच पटकको च्याम्पियन मुम्बई इन्डियन्सले १७ करोड ५० लाख भारुमा अनुबन्ध गरेको छ । ग्रीनले आइपिएल इतिहासमा सर्वाधिक मूल्य पाउने दोस्रो खेलाडी हुन् । यसै अक्समा इंग्ल्यान्डका साम करनलाई पन्जाब किंग्सले १८ करोड ५० लाख भारुमा किनेको थियो । करनपछि उनी इतिहासकै सर्वाधिक मूल्य पाउने खेलाडी हुन् ।

विष्फोटक ब्याटरसँगै तीव्र गतिका बलर हुँदा महँगो मूल्य पाएका हुन् । ग्रीनलाई किन्न अक्सनमा रोयल च्यालेन्जर्स बेंगलोर र मुम्बई इन्डियन्सबीच कडा प्रतिस्पर्धा भएपछि क्यामरन ग्रीनले १७ करोड ५० लाख भारु पाएका हुन् ।

ग्रीन तीव्र गतिको बलिङसँगै विष्फोटक ब्याटिङ गर्ने गर्दछन् । उनले ब्याटिङमा ओपनिङदेखि तल्लोक्रम सम्म खेल्न सक्छन् । गत सेप्टेम्बरमा भारतविरुद्ध ग्रीनले ३० बलमा ८ चौका र ४ छक्कासहित ६१ रनको विष्फोटक इनिङ खेलेपछि अष्ट्रेलियाले २ सय ९ रनको लक्ष्य चार बल अगाडिनै पूरा गरेको थियो ।

त्यसै सिरिजमा भारतविरुद्ध २१ बलमा ७ चौका र ३ छक्कासहित ५२ रनको विष्फोटक इनिङ खेले । त्यसक्रममा उनले १९ बलमै अर्धशतक हानेका थिए । अग्ला कदका ग्रीनले अष्ट्रेलियाको टेस्ट र ओडिआईमा लगातार सानदार प्रदर्शन गर्दै आएका छन् । त्यसैको कारण मुम्बईले महँगो मूल्य खर्चिएको हो । ग्रीनको अनुबन्धले मुम्बईको टोली सन्तुलित समेत बन्ने छ ।

साम करन – १८ करोड ५० लाख भारु

इंग्ल्यान्डका युवा अलराउन्डर साम करन आइपिएल इतिहासकै सर्वाधिक महँगो मूल्य १८ करोड ५० लाख भारुमा पन्जाब फर्किएका छन्। आइपिएल इतिहासमा सर्वाधिक महँगो मूल्य समेत हो । रोयल च्यालेन्जर्स बेंगलोरले २०१८ देखि २१ सम्म विराट कोहलीलाई १७ करोड भारुमा रिटेन गरेको थियो । २०२२ मा लखनउले लोकेश राहुललाई १७ करोड भारुमै किनेको थियो ।

अक्सनमा भने सर्वाधिक मूल्य २०२१ मा दक्षिण अफ्रिका क्रिस मोरिसलाई राजस्थान रोयल्सले १६ करोड २५ लाखमा किनेको थियो । अक्सनमा कुनैपनि खेलाडीले पाएको त्यहिँनै सर्वाधिक मूल्य थियो ।

न्यूनतम मूल्य २ करोड भारु राखेका साम करनलाई अक्सनमा किन्न मुम्बई इन्डियन्स र रोयल च्यालेन्जर्स बेंगलोरबीच प्रतिस्पर्धा भएको थियो । ७ करोडपछि मुम्बईसँग राजस्थान रोयल्सले अक्सनमा प्रतिस्पर्धा गरेको थियो । राजस्थानले १० करोडमा अग्रता लिएको थियो । पछि मुम्बईले थप प्रतिस्पर्धा गर्यो ।

११ करोड ५० लाखपछि चेन्नई र पन्जाब आएपछि अक्सन झनै रमाइलो बनेको थियो । राजस्थानसँग अक्सनमा १३ करोड २० लाख भएको हुँदा पछि परेको थियो । पन्जाबले १५ करोड मूल्य हालेपछि चेन्नई रोकिएको थियो । केहि समय रोकेपछि चेन्नईले पुन मूल्य लगाएको थियो । पछि पुन मुम्बई, लखनउ र पन्जाबबीच कडा प्रतिस्पर्धा भएपछि कीर्तिमानी मूल्य पाएका थिए ।

इंग्ल्यान्डलाई टि२० विश्वकप जिताउन नायक बनेका उनले मूल्य पनि त्यसै अनुसार पाएका हुन् । बायाँ हाते साम करन तीव्र गतिको बलिङसँगै तल्लोक्रममा राम्रो ब्याटिङ गर्दछन् । अघिल्लो महिना इंग्ल्यान्डले टि२० विश्वकप जित्दा साम करनले डेथ ओभरमा सानदार प्रदर्शन गर्दै प्रतियोगिताकै सर्वोत्कृष्ट खेलाडी चुनिएका थिए ।

करनले उक्त विश्वकपमा ६ खेलमा १३ विकेट लिएका थिए । फाइनलमा पाकिस्तानविरुद्ध ४ ओभरमा १२ रन खर्चेर ३ विकेट र सुपर १२ मा अफगानिस्तानविरुद्ध ३.५ ओभरमा १० रन खर्चेर ५ विकेट लिएका थिए । इंग्ल्यान्डको टोलीबाट साम करनले तीनै शैलीमा लगातार दमदार प्रदर्शन गर्दै आएका छन् । साम करनले ३२ आइपिएल खेल खेलेका साम करनले दुई अर्धशतकसहित ३ सय ३७ रन बनाउनुको साथै ३२ विकेट लिएका छन् ।

डेथ ओभरमा उत्कृष्ट बलिङ र जुनसुकै भूमिका सानदार ब्याटिङ गर्ने हुँदा उनले महँगो मूल्य पाएका छन् । पन्जाबले चार विदेशी खेलाडीमा जोनी बेयरस्टो, कागिसो रबाडा, लियाम लिभिङस्टोन र साम करनलाई खेलाउने छ । करनले डेथ ओभर र रबाडाले पावर प्लेमा सानदार प्रदर्शन गर्ने पन्जाबले अपेक्षा राख्नेछ ।

यसअघि हाम्रो खेलकुद डट कमले अनुमान गरेको बिक्न सक्ने सर्वाधिक पाँच महँगो खेलाडीमा पनि यी पाँच जनानै थिए । आइपिएल अक्सनमा पैसा वर्षा हुनसक्ने पाँच खेलाडी