काठमाडौं (हाम्रो खेलकुद) – जनकपुर रोयल्सले नेपाल टि२० लिगमा पोखरा एभेन्जर्सलाई ६ विकेटले हराउँदै प्लेअफमा स्थान पक्का गरेको छ । छैटौं जितका साथ जनकपुरले शीर्ष दुईमा रहँदै क्वालिफायर खेल्ने सम्भावना मजबुत बनाएको छ।

जितको लागि ६९ रनको विजयी लक्ष्य पछ्याएको जनकपुरले ९ ओभरमा ४ विकेट गुमाउँदै पूरा गर्यो । जनकपुरका ओपनर शराफुद्दिन अशरफले २७ बलमा ३ चौका र ३ छक्कासहित सर्वाधिक ३७ रन बनाए ।

अर्का ओपनर ट्रभोन ग्रिफिथले १३ बलमा ३ चौकासहित १७ रनमा आउट भए । पोखरका कुशल मल्लले ३ ओभरमा १० रन खर्चेर ३ विकेट लिए । असिथा फ्रेनान्डोले एक विकेट लिए ।

त्यसअघि टियु क्रिकेट मैदानमा टस हारेर पहिला ब्याटिङकोे निम्तो पाएको पोखरा ६८ रनमा अल आउट भयो । यो नेपाल टि२० लिगमा पुरै २० ओभरको खेलमा सबैभन्दा कम योगफल हो । यसअघि ९–९ ओभरको खेलमा विराटनगर सुपर किंग्स काठमाडौंसँग ५८ रनमा अल आउट भएको थियो ।

पोखराका सिद्धान्त लोहनीले १० बलमा २ छक्कासहित सर्वाधिक १७ रनमा आउट भए । आसिफ शेख १० बलमा ३ चौकासहित १६ रनमा आउट भए । कुशल मल्लले १८ बलमा २ छक्काहित १६ रन बनाए ।

लज्जास्पद ब्याटिङ गर्नेक्रममा पोखराका ८ खेलाडीले दोहोरो अंकमा रन बनाउन सकेनन् । ओपनर सुमित महर्जन एक, आरिफ शेख दुई, उपुल थरंगा, आमिर हाम्जा शून्य र विपिन खत्री ८ रनमा आउट भए ।

जनकपुरका सोमपाल कामीले २ ओभरमा ८ रन खर्चेर ३ विकेट लिए । ललित नारायण राजवंशीले ३ ओभरमा १ मेडनसहित ६ रन खर्चेर २ विकेट लिए । शराफुद्दिन अशरफले १ ओभरमा ४ रन खर्चेर २ विकेट लिए । जितेन्द्र मुखिया, ट्रेभन ग्रिफिथ र पवन सरार्फले एक एक विकेट लिए ।

अंक तालिका

लुम्बिनी ९ खेलमा ८ मा जित र १ हारसहित १६ अंकका साथ शीर्षस्थानमा छ । अन्तिम खेल लुम्बिनीले शुक्रबार जनकपुरसँग खेल्नेछ । उक्त खेलमा हारेपनि शीर्ष स्थानमै रहनेछ । जनकपुर रोयल्स ९ खेलमा ६ मा जित र ३ मा हारसहित १२ अंकका साथ दोस्रो स्थानमा छ । जनकपुर अन्तिम खेलमा विजयी हुँदा शीर्ष दुईमा स्थान पक्का हुनेछ ।

जनकपुर पराजित हुँदा भने काठमाडौंको नतिजामा भर पर्नेछ । काठमाडौंले बाँकी दुई मध्य एक खेल हार्दा पनि जनकपुर शीर्ष दुईमा रहनेछ । काठमाडौं ८ खेलमा ४ मा जित र ४ मा हारसहित ८ अंकका साथ तेस्रो स्थानमा छ । विराटनगर सुपर किंग्स ८ खेलमा ३ मा जित र ५ मा हारसहित ६ अंकका साथ चौथो स्थानमा छ ।

पोखरा ९ खेलमा ३ मा जित र ६ मा हारसहित ६ अंकका साथ पाँचौं स्थानमा छ । फार वेस्ट युनाइटेड ७ खेलमा १ मा जित र ६ मा हारसहित पुछारमा छ ।