काठमाडौं (हाम्रो खेलकुल) – कप्तान ट्रभोन ग्रिफिथको विष्फोटक ब्याटिङमा जनकपुर रोयल्सले नेपाल टि२० लिगमा लुम्बिनी अल स्टार्सलाई १ सय ६० रनको प्रतिस्पर्धात्मक लक्ष्य दिएको छ । टियु क्रिकेट मैदानमा टस हारेर पहिला ब्याटिङ थालेको जनकपुरले निर्धारित १७ ओभरमा ६ विकेट गुमाउँदै १ सय ५९ रन बनायो ।

जनकपुर रोयल्स समयमै मैदान नआएपछि खेल भने ढिलो सुरु भएको थियो । निर्धारित समय अनुसार टस ८ : ३० मा हुनुपर्ने थियो । तर जनकपुर होटलबाट मैदान भने विहान ९ :४ मा आइपुगेको थियो । त्यसैको कारण खेल ढिलो सुरु भएको थियो । कप्तान ट्रभोन ग्रिफिथ ११ बलमा ३ चौका र ५ छक्कासहित ४७ रनमा अविजित रहे ।

जनकपुरका ओपनर शराफुद्दिन अशरफले १८ बलमा ५ चौका र १ छक्कासहित ३४ रनमा आउट भए । खडक बोहरा ३० बलमा २२, दीलिप नाथ १० र अशान प्रियन्जनले ८ रन बनाए ।

लुम्बिनी अल स्टार्सका सागर ढकालले ४ ओभरमा १७ रन खर्चेर २ विकेट लिए । कुशल भुर्तेल ३ ओभरमा २७ रन खर्चेर २ विकेट लिए । प्याट ब्राउनले ४ ओभरमा ४५ रन खर्चेर १ विकेट लिए । ईशान पाण्डेले एक विकेट लिए ।

लुम्बिनीको कप्तानी कुशल भुर्तेलले गरेका छन् । लुम्बिनीले दीपेन्द्रसिंह ऐरी र किशोर महतोलाई विश्राम दिएको छ । जनकपुरले सोमपाल कामी, सन्दीप जोरा र चाडविक वाल्टनलाई विश्राम दिएको छ ।

लुम्बिनी ९ खेलमा ८ मा जित र १ मा हारसहित १६ अंक जोड्दै शीर्ष स्थानमा छ । जनकपुर ९ खेलमा ६ मा जित र ३ मा हारसहित १२ अंकका साथ दोस्रो स्थानमा छ । यी दुई टोली शीर्ष दुईमा रहँदै क्वालिफायर खेल्ने पक्का भएको छ ।