काठमाडौं (हाम्रो खेलकुद) – स्पिनर राज नान्ननको घातक बलिङमा काठमाडौं नाइट्सले नेपाल टि२० लिगको प्लेअफमा पुग्न विराटनगर सुपर किंग्सलाई १ सय ५५ रनको मध्यम लक्ष्य दिएको छ।

टियु क्रिकेट मैदानमा टस जितेर पहिला ब्याटिङ थालेको काठमाडौंले निर्धारित २० ओभरमा ६ विकेट गुमाउँदै १ सय ५४ रन बनायो । काठमाडौंका एलेक्स ब्लेकले २६ बलमा २ चौका र २ छक्कासहित ३४ रन बनाए ।

ओपनर सन्तोष कार्कीले ३४ बलमा ४ चौका र १ छककासहित ३४ रन बनाए । अर्का ओपनर सुनम गौतम ८ र लोकेश बम शून्यमा आउट भए । मध्यक्रमका ब्याटर सन्दीप रजाली २४ बलमा २ चौका र १ छककासहित ३० रनमा आउट भए । ज्ञानेन्द्र मल्ल १३ बलमा २ चौका र १ छक्कासहित २२ रनमा अविजित रहे । ज्ञानेन्द्रले अन्तिम बलमा नन्दन यादवलाई मिडविकेटमा छक्का प्रहार गर्दै इनिङ सकाएका थिए ।

बसिर अहमदले ८ बलमा १ चौका र १ छक्कासहित १७ रनमा अविजित रहे । काठमाडौंले आज विदेशी खेलाडीको रुपमा एलेक्स ब्लेकलाई मात्रै खेलाएको छ । विराटनगरका स्पिनर राज नान्नन ४ ओभरमा १ मेडनसहित १३ रन खर्चेर ४ विकेट लिए । नन्दन यादव र रोहित पौडेलले एक एक विकेट लिए । विजेता टोली तेस्रो स्थानमा रहँदै प्लेअफ खेल्नेछ ।

काठमाडौं ९ खेलमा ४ मा जित र ५ मा हारसहित ८ अंकका साथ तेस्रो स्थानमा छ । काठमाडौंले अन्तिम खेल शनिबार विराटनगरसँग खेल्नेछ । विराटनगरलाई हराउँदा काठमाडौंको १० अंक हुनेछ । तेस्रो स्थानमा रहँदै एलिमिनेटर खेल्नेछ । यदि काठमाडौं पराजित हुँदा भने उता पोखरा फार वेस्टसँग हार्नुपर्ने हुन्छ । वा पोखरा जित अन्तर निकै झिनो हुनुपर्छ ।

विराटनगर सुपर किंग्स ९ खेलमा ४ मा जित र ५ मा हारसहित ८ अंकका साथ चौथो स्थानमा छ । विराटनरले अन्तिम खेलमा काठमाडौंलाई हराउँदा १० अंकका साथ एलिमिनेटर खेल्नेछ । विराटनगर काठमाडौंसँग पराजित हुँदा अन्तिम खेलमा पोखरा पराजित हुनु पर्ने हुन्छ ।