काठमाडौं(हाम्रो खेलकुद) – जनकपुर रोयल्सले नेपाल टि२० लिगको पहिलो क्वालिफायरमा लुम्बिनी अल स्टार्सविरुद्ध टस जितेर पहिला फिल्डिङ गर्ने निर्णय लिएको छ । टियु क्रिकेट मैदानमा भएको टसमा जनकपुरका कप्तान ट्रेभोन ग्रिफिथले पहिला फिल्डिङ गर्ने निर्णय लिएका हुन् ।

जनकपुरको टोलीमा सोमपाल कामी र सन्दीप जोरा फर्किएका छन् । लुम्बिनीको कप्तान दीपेन्द्रसिंह ऐरी र किशोर महतो पनि टोलीमा फर्किएका छन् । लुम्बिनी १० खेलमा ८ मा जित र २ मा हारसहित १६ अंकका साथ शीर्ष स्थानमा रहँदै क्वालिफायर खेलेको हो । जनकपुर १० खेलमा ७ मा जित र ३ मा हारसहित दोस्रो स्थानमा रहँदै क्वालिफायर खेलेको हो ।

यस खेलको विजेता टोली सोझैं फाइनलमा पुग्नेछ । पराजित हुने टोलीले दोस्रो क्वालिफायर खेल्नेछ । मंगलबार एलिमिनेटर खेलमा विराटनगर सुपर किंग्स र काठमाडौं नाइट्सबीच प्रतिस्पर्धा हुनेछ । जसको विजेता टोलीले पहिलो क्वालिफायरमा पराजित हुने टोलीसँग भिड्नेछ ।

लुम्बिनीको प्लेइङ ११ :

दीपेन्द्रसिंह ऐरी, अनिल कुमार शाह, कुशल भुर्तेल, गुलशन झा, सागर ढकाल, किशोर महतो, ईशान पाण्डे, लाहिरु मिलान्था, साड्ली भान स्केलक्किक, विपुल शार्मा र हरम्रीत सिंह ।

जनकपुरको प्लेइङ ११ : सोमपाल कामी, सन्दीप जोरा, ललितनारायण राजवंशी, पवन सरार्फ, जितेन्द्र मुखिया, राजेश पुलामी मगर, दीलिथ नाथ, ट्रेभोन ग्रिफिथा, अशान प्रियनजन, समिउल्लाह शिनवारी र शराफुद्दिन अशरफ ।