काठमाडौं (हाम्रो खेलकुद) – जनकपुर रोयल्सका उप–कप्तान सोमपाल कामीले आफ्नो एउटा म्याच विनर होटलमै रहँदा सोचे जस्तो नतिजा नआएको बताएका छन् । नेपाल टि२० लिगको पहिलो क्वालिफायर खेलमा लुम्बिनी अल स्टार्सले जनकपुर रोयल्स ६ रनले पराजित भएपछि सोमपालले उक्त प्रतिक्रिया दिएका हुन् ।

‘मलाई लाग्छ आज विकेट हल्का फरक थियो । उनीहरुले एकदमै राम्रो ब्याटिङ गरे । हाम्रो गल्तीहरु धेरै भयो । हामी जित्न आज डिजरर्भ(योग्य) नै गर्ने थिएनौं । किनभने हामीले धेरै गल्तीहरु गर्यौ । यो स्तरमा त्यो गल्ती गरेपछि पक्कैपनि अर्को टोली हावी हुन्छ । त्यसले गर्दा हामी कहिँ न कहिँ पछि परेका हौं । हामीले १ सय २० रन सम्म रोक्न सक्थ्यौं । एक्स्ट्रा २० रन जति बनाउन दियौं त्यसैले हार्न पुग्यौं’, हारपछि सोमपालले भने ।

टियु क्रिकेट मैदानमा टस हारेर पहिला ब्याटिङको निम्तो पाएको लुम्बिनीले निर्धारित २० ओभरमा ८ विकेट गुमाउँदै १ सय ४३ रन बनायो । एक समय ३२–४ को खराब सुरुवात गरेको लुम्बिनीलाई पाँचौं विकेटका लागि अनिल कुमार शाह र ईशान पाण्डेले ६२ रनको साझेदारी गर्दै इनिङ उकासेका थिए । जसक्रममा जनकपुरले दुई महत्वपूर्ण क्याच छोड्न पुगेको थियो । जितको लागि १ सय ४४ रनको विजयी लक्ष्य पछ्याएको जनकपुरले २० ओभरमा ७ विकेट गुमाउँदै १ सय ३७ रन बनायो ।

खेल १२ बजे सुरु हुनुपर्ने थियो । तर जनकपुर मैदान पुग्न ढिलो गरेपछि खेल केहि ढिलो भएको थियो । जनकपुरले लुम्बिनीविरुद्ध लिग चरणको खेलमा पनि निर्धारित समय भन्दा ढिलो मैदान पुगेको थियो । वेस्टइन्डिजका विकेटकिपर चाडविक वाल्टन भने जनकपुरको टोलीमा थिएनन् । सोमपालको अनुसार उनी होटलमै बसेका छन् ।

‘मलाई के लाग्छ भने हजुरलाई जे लाग्छ त्यहि समस्या हो । पक्कैपनि खेलाडी मानसिक रुपमा स्वतन्त्र छैन (फ्रिड्ली माइन्ड सेट) छैन । हाम्रो टिमको एउटा म्याच विनर होटलमै छ । त्यसले गर्दा पनि नतिजा हामीले सोचे जस्तो आएको छैन’, सोमले टिमको वातावरणबारे भने ।

चाडविक वाल्टनले प्रतियोगिताको ८ खेलमा ३ अर्धशतकसहित कुल २ सय ७८ रन बनाएका छन् । वाल्टन जनकपुरबाट यस प्रतियोगितामा सर्वाधिक रन बनाउने ब्याटर हुन् । नेपाल टि२० लिगमा सर्वाधिक रन बनाउने ब्याटरको रुपमा उनी छैटौं स्थानमा छन् । उनले पछिल्लो खेल लुम्बिनीविरुद्ध नै ५९ रनको अविजित इनिङ खेलेका थिए । त्यसपछि लुम्बिनीले लिगमा पोखरा एभेन्जर्स र लुम्बिनीसँग खेलेको थियो । उनी टोलीमा थिएनन् ।

मैदानमा आएपछि प्रदर्शन गर्नुपर्ने सोमपाल बताउँछन् । ‘एउटा व्यावसायिक खेलाडी भएपछि मैदानमा आएर प्रदर्शन गर्नुपर्ने हुन्छ । बाउन्ड्रीको बाहिर जे पनि हुन्छ । भित्र आएपछि गर्नु पर्यो । हामीले पैसा पाएको छैन । त्यसैले शतप्रतिशत नदिएको भन्ने चाहिँ होईन । हामीले शत प्रतिशत नै दिएको हो । पहिला पनि हामीले पैसा पाएको थिएनौं । हामीले जित्दै गएका थियौं । हारेपछि मलाई लाग्दैन यो कुराले असर गर्छ’, उनले टोलीको समस्या बारे भने ।

केहि दिन अघि क्यानले छिट्टै खेलाडीले पैसा पाउने बताएको थियो । त्यसपछि केहि पैसा पाएको सोमपाल बताउँछन् । ‘पैसा लगभग आइरहेको । जे होस् पैसा आओरहेको छ । अहिलेसम्म ६५ प्रतिशत जति आएको छ । अब एक दुई दिनमा पुरा हुन्छ होला’, सोमपालले खेलाडीको पैसा बारे बताए ।

सोमबार एलिमिनेटरमा काठमाडौं नाइट्स र विराटनगर सुपर किंग्सको विजेताले फाइनलमा पुग्न जनकपुरसँग खेल्नुपर्ने हुन्छ । फाइनल बुधबार हुनेछ ।