काठमाडौं (हाम्रो खेलकुद) – कप्तान रोहित पौडेलको अर्धशतक र विवेक यादवको विष्फोटक ब्याटिङमा विराटनगर सुपर किंग्सले नेपाल टि२० लिगको एलिमिनेटर खेलमा काठमाडौं नाइट्सलाई १ सय ८३ रनको बलियो लक्ष्य दिएको छ ।

टियु क्रिकेट मैदानमा टस जितेर पहिला ब्याटिङको निम्तो पाएको विराटनगरले निर्धारित २० ओभरमा ६ विकेट गुमाउँदै १ सय ८२ रन बनायो । विराटनगरका रोहित पौडेलले ४९ बलमा ६ चौका र २ छक्कासहित ६१ रनमा आउट भए । रोहितको यो नेपाल टि२० लिगमा चौथो अर्धशतक हो । रोहित स्पिनर अनिल खरेलको बलमा एज लागेर सट फाइन लेगमा सौरभ खनालबाट क्याच आउट भए ।

योसँगै रोहित सर्वाधिक रन बनाउने ब्याटरमा दोस्रो स्थानमा उक्लिएका छन् । रोहितले ३ सय ४७ रन बनाउँदा फार वेस्टका युनाइटेडका हश्मातुल्लाह शाहिदी ४ सय रनका साथ शीर्ष स्थानमा छन् । विवेक यादव १८ बलमा ३ चौका र ३ छक्कासहित ४६ रनमा अविजित रहे । अन्तिम ओभरको सुरुवाती चार बलमा विवेकले कमलसिंह ऐरीलाई दुई चौका र दुई छक्का हान्दै राम्रो योगफलको आधार तय गरेका थिए ।

ओपनर गौरान्शु शर्मा एक र अर्जुन साउद दुई रनमा आउट भएपछि विराटनगर ५–२ को कमजोर सुरुवात गरेको थियो । तेस्रो विकेटका लागि रोहित र हुसेन तालतले ९८ रनको साझेदारी गरे । तालत २३ बलमा १ चौका र ३ छक्कासहित ३८ रनमा आउट भए । तालत खरेलको बलमा स्लिपमा सौरभ खनालबाट क्याच आउट भए ।

पृथु बाँंस्कोटा एक रनमा आउट हुँदा राज नान्नन १७ बलमा १ चौका र १ छक्कासहित २३ रनमा अविजित रहे ।
काठमाडौंका अनिल खरेलले ४ ओभरमा ३७ रन खर्चेर २ विकेट लिए । गौतम केसीले ४ ओभरमा २० रन खर्चेर १ विकेट लिए । कमलसिंह ऐरी र अभिनाश बोहराले एक विकेट लिए ।

यस खेलको विजेता दोस्रो क्वालिफायरमा पुग्नेछ । दोस्रो क्वालिफायरमा जनकपुर र यस खेलको विजेता भिड्नेछन् । पहिलो खेलमा लुम्बिनी अल स्टार्सले जनकपुरलाई ६ रनले हराउँदै फाइनलमा स्थान बनाएको छ ।