भूपेन्द्र जि.सी., काठमाडौं

क्रिकेटमा विरलै टिममा भएका सबै खेलाडी खेल्न पाउँछन् । टस अघि सम्म कुन खेलाडी खेल्छ भन्न मिल्दैन । कम्तिमा टोलीमा भएका १४ खेलाडी मध्य ११ खेलाडी मात्रै खेल्न पाउँछन् । त्यसैले केहि खेलाडीमा कसले मौका पाउँछ दुविधा हुन्छ । केहि खेलाडी बेन्चमा बस्छन् ।

प्लेइङ ११ मा नपरेपछि खेलाडी सुचिमा उल्लेख गरेअनुसार बेन्चमा बस्ने खेलाडीले मात्र मैदानभित्र खेलेका अन्य खेलाडीलाई पानी र खानी कुरा पुर्याउनु पर्ने हुन्छ । तर नेपाल टि२० लिगमा काठमाडौं नाइट्सले सोमबार एलिमिनेटर खेलमा विराटनगर सुपर किंग्ससँग खेल्नु अघिल्लो दिननै प्लेइङ-११ पक्का थियो । किनभने विदेशी खेलाडी सबै फर्किएपछि टोलीमा बाँकी ११ नेपाली मात्रै थिए ।

सोमबार काठमाडौंले त्यहि ११ खेलाडीलाई मैदान उतायो । डग आउटमा काठमाडौंका कुनैपनि खेलाडी थिएनन् । पहिला टस जितेर विराटनगरले ब्याटिङ रोज्यो । फिल्डिङमा काठमाडौंको टोली मैदान उत्रिदा पानी दिने आफ्नो खेलाडी थिएनन् ।
काठमाडौं डग आउट खाली जस्तै थियो । काठमाडौं प्रशिक्षक र म्यानेजर पहिला देखिनै विहिन थियो । डग आउटमा एकमात्रै फिजियो सागर पाण्डे थिए । अरु शून्य ।

काठमाडौंका खेलाडीलाई पानी दिने आफ्ना खेलाडी थिएनन् । त्यसैले विराटनगरका अमरसिंह राउटेलाले त्यो सहयोग गरेका थिए । आफ्ना खेलाडी ब्याटिङमा भएपनि मैदानको सबै भागतिर डुल्दै अमरले काठमाडौंका खेलाडीलाई पानी र खानेकुरा दिएका थिए । ड्रिङ्स ब्रेकको समयमा भने पानी बोकेर फिजियो सागर पुगेका थिए ।

अवस्था यस्तो थियो कि यदि काठमाडौंको कुनै खेलाडी घाइते भएमा फिल्डिङ गर्ने वैकिल्पक खेलाडी थिएनन् । काठमाडौं एलिमिनेटर खेलमा विराटनगरसँग ९९ रनले पराजित हुँदै बाहिरियो । १ सय ८३ रनको विजयी लक्ष्य पछ्याएको काठमाडौं १२.४ ओभरमा ८३ रनमा अल आउट भयो ।

काठमाडौंका बाँकी रहेका दुवै विदेशी खेलाडी विरनदीप सिंह र एलेक्स ब्लेक शनिबार घर फर्किएका छन् । रायन बर्ल र आजमतुल्लाह ओमरजाई भने पहिला नै फर्किसकेका थिए । अक्सनमा ११ खेलाडी मात्रै राख्न पाइने नियम थियो । विदेशी खेलाडी सबै घर गएपछि नेपाली खेलाडी मात्रै थिए । खेलपछि ज्ञानेन्द्र मल्लले पहिलो पटक ११ खेलाडीका साथ खेल्नुमा व्यवस्थापन पक्षको गल्ती बताउँछन् ।

‘कस्तो के भन्दा पनि पहिला त हाम्रो व्यवस्थापन पक्षको मिस कमिनिकेसन जस्तो लाग्छ । अन्तिम समयमा टिम मालिक परिवर्तन हुनु पर्यो । सबै कुरा चाडो परिवर्तन भरहेको थियो । त्यसले गर्दा यहि तरिकाले जाने भन्ने भएन । ढिलो पनि जस्तो सोचेको थियो । त्यस्तो भएन’, ज्ञानेन्द्रले भने ।

‘११ मा ११ नै खेल्दा छनोट सजिलो । सिधैं मैदानमा गयो । यो नयाँ अनुभव थियो । तरपनि अरु कोहि पनि एकै पटक इन गर्न सक्छ जस्तो मलाई लाग्दैन । तरपनि ठिकै छ जे भयो राम्रो नै भयो’, ज्ञानेन्द्रले खेलपछि भने ।

यसले नेपाल क्रिकेट संघ (क्यान) ले आयोजना गरेको प्रतियोगिता कतिसम्म कमजोर छ अनुमान गर्न सकिन्छ । ज्ञानेन्द्र सबैको गल्ती भएको बताउँछन् । ‘बोर्डले मात्रै होईन । मलाई लाग्छ फ्रेन्चाइज मालिक देखि सबै म्यानेजमेन्टको कुरा हो । म्यानेजमेन्टले अझ राम्रो तरिकाले सम्हाल्न सक्नुपर्दथ्यो’, उनले भने ।

विदेशी खेलाडी फर्किनुमा धेरै समस्याहरु रहेको ज्ञानेन्द्र बताउँछन् । ‘धेरै समस्याहरु आइरहेको थियो । पछि टिकट पनि त्यहि अनुरुप भएको रहेछ । टिकटहरु पहिला नै भई सकेको भएर फर्कनु भयो, ‘विदेशी खेलाडी फर्किएकोबारे ज्ञानेन्द्रले भने ।

नेपाल टि२० लिग सर्वाधिक ठूलो नेपाली प्रतियोगिता भनिएको छ । तर काठमाडौंको टोलीमा प्रशिक्षक, म्यानेजर र बेन्चमा बस्ने खेलाडी छैनन् । यस पटक नेपाल टि२० लिगमा मैदानमा दर्शक पनि खासै आएका छैनन् । सोमबार एलिमिनेटर खेलमा एक सय समर्थक पनि मैदानमा थिएनन् । खेलाडी खेल्नेमा केन्द्रित हुनुपर्ने ज्ञानेन्द्र बताउँछन् ।

ज्ञानेन्द्र विदेशी खेलाडी विना नै खेल्दा खराब प्रदर्शन भने नगरेको बताउँछन् । ‘हामीले नै राम्रो गरेनौं । सुरुवात देखि नै ग्राउन्ड भित्रको कारणले लाग्छ । यो हामीलाई एकदिन अगाडि नै थाहा थियो । अचानक भएको कुरा पनि होईन । जे जति स्रोतबाट हामीले अझ उत्कृष्ट गर्न सक्थ्यौं’, ज्ञानेन्द्रले भने ।

यता विराटनगरका कप्तान रोहितले यो विरलै हुने घटना बताए । ‘क्रिकेट खेल हो । जे पनि हुनसक्छ । विदेशी खेलाडी नभएपनि नेपालीले जे पनि गर्न सक्छ । टि२० खेलमा जे पनि हुनसक्छ । त्यसैले हामीले त्यस्तो कमजोर लिएका थिएनौं । हामीले आफ्नो न्यूनतम कुरा पछ्याएका थियौं’, जितपछि रोहितले भने, ‘त्यसैमा थपे, टोलीमा प्लेइङ ११ मात्रै भएको सुन्दा अलिकति अचम्म लाग्यो । किनभने सामान्यतया यस्तो हुँदैन ।’

काठमाडौंको खेल सकियो । तर खेलाडीले अहिले सम्म केहिपनि पैसा पाएका छैनन् । विदेशी खेलाडी सबै आफ्नै खर्चमा स्वदेश फर्किएका छन् । दुई तीन फ्रेन्चाइजहरुले केहि प्रतिशत रकम पाउँदा काठमाडौंका खेलाडीको अवस्था भने शून्य छ ।

‘आशा गरौं आज बेलुका वा भोली सम्ममा आइपुग्छ होला । हैन वहाँहरुले जिम्मा लिन्छु भन्नु भएको छ । हामी एउटा विश्वासमै छौं । अहिलेसम्म केहि पाएका छैनौं । जिम्मेवारी क्यान र मालिक दुवैले लिनुभएको छ’, पारिश्रमिकबारे ज्ञानेन्द्रले भने ।

काठमाडौंमा पर्याप्त विकल्प नभएपछि यो पनि : जव विकेटकिपरले बलिङ गर्नु पर्यो…