काठमाडौं (हाम्रो खेलकुद) – लुम्बिनी अल स्टार्सले नेपाल टि२० लिगको फाइनलमा उपाधि जित्न विराटनगर सुपर किंग्सलाई १ सय ३४ रनको मध्यम लक्ष्य दिएको छ । टियु क्रिकेट मैदानमा टस जितेर पहिला ब्याटिङ थालेको लुम्बिनी १९.२ ओभरमा १ सय ३३ रनमा अल आउट भयो ।

लुम्बिनीको लागि ओपनर लाहिरु मिलान्थाले २८ बलमा ३ चौका र ३ छक्कासहित ४१ रनमा आउट भए । लुम्बिनीले राम्रो सुरुवात गर्यो । ओपनर लाहिरु मिलान्था र हरमीत सिंहले ५.५ ओभरमा ६४ रनको आक्रामक सुरुवात गरेको थियो । तर पावर प्लेपछि त्यो सुरुवातमा गिरावट आयो । केओन जोशेफको बलमा हरमीत रोहित पौडेलबाट क्याच आउट भए ।

सूर्य तामाङले लगत्तै अर्को ओभरमा कुशल भुर्तेललाई एक रनमा विकेटकिपर अर्जुन साउदबाट स्टम्पिङ आउट भए । रोहित पौडेलले मिलान्थालाई नन्दन यादवबाट क्याच गराएपछि विराटनगर खेलमा फर्किएको थियो । नन्दनले मिलान्थाको उत्कृष्ट क्याच लिएका थिए ।

स्पिनर राज नान्ननको बलमा चोभार एण्डतर्फ ठूलो सट खेलेपनि गौरांशु शर्माले २० रनमा क्याच लिँदै पेभेलिएन फर्काए । ईशान पाण्डे १८, विपुल शर्मा ५, गुलशन झा ३, साड्ली भान स्केलक्किक १, अनिलकुमार शाह ८ र किशोर महतो २ रनमा आउट भए ।
नन्दन यादवले ३.२ ओभरमा २२ रन खर्चेर २ विकेट लिए । राज नान्ननले ३ ओभरमा २४ रन २ विकेट लिए । हुसेन तालत, केओन जोशेफ, सूर्य तामाङ र रोहित पौडेलले एक एक विकेट लिए । विजेता टोलीले ५५ लाख प्राप्त गर्दा उप विजेता टोलीले ३० लाख रुपैयाँ प्राप्त गर्ने छन् ।