काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा अर्को महिना घरेलु मैदान टियुमा नामिबियासँग पहिलो खेल खेल्ने भएको छ । नेपाल क्रिकेट संघ (क्यान) ले घरेलु मैदानमा हुने नेपाल, नामिबिया र स्कटल्यान्डबीच हुने त्रिकोणात्मक ओडिआई सिरिजको खेल तालिका सार्वजनिक गरेको छ ।

नेपालले पहिलो खेल फागुन २ (फेब्रुअरी १४) मा नामिबियासँग खेल्नेछ । दोस्रो खेल फागुन ५ (फेब्रुअरी १७) मा स्कटल्यान्डसँग खेल्नेछ । नेपालले फागुन ६ (फेब्रुअरी १८) मा नामिबियासँग खेल्नेछ । नेपालले यस सिरिजको अन्तिम खेल फागुन ९(फेब्रअरी २१) मा स्कटल्यान्डसँग खेल्नेछ ।

योसँगै नेपाल, स्कटल्यान्ड र नामिबीयाबीचको त्रिकोणात्मक ओडिआई सिरिज सकिनेछ । त्यसपछि नेपालले घरेलु मैदानमा पपुवा न्युगिनी र युएईसँग आइसिसी विश्वकप लिग २ मा त्रिकोणात्मक ओडिआई सिरिज खेल्नेछ । विदेशमा नेपालले पपुवा न्युगिनमीमा गएर त्रिकोणात्मक ओडिआई सिरिज खेल्नेछ ।

स्कटल्यान्ड ३२ खेलमा २२ मा जित र ८ मा हारसहित ४६ अंक जोड्दै च्याम्पियन बनि सकेको छ । ओमान ३६ खेलमा २१ खेलमा जितका साथ ४४ अंक जोड्दै दोस्रो स्थानमा छ । नामिबिया ३० खेलमा १८ मा जितसहित ३७ अंक जोड्दै तेस्रो स्थानमा छ ।

नेपाल २४ खेलमा ८ मा जितसहित १८ अंक जोड्दै छैटौं स्थानमा छ । नेपालले अव विश्वकप लिग २ मा १२ खेल खेल्न बाँकी छ । शीर्ष पाँचमा पर्दै ओडिआई मान्यता जोगाउन कम्तिमा १० खेल जित्नु पर्ने हुन्छ । पपुवा न्युगिनी २८ खेलमा २ मा जितसहित पुछारमा छ । अमेरिका ३६ खेलमा १६ मा जितसहित ३५ अंक जोड्दै पाँचौं स्थानमा छ । युएई २६ खेलमा १२ मा जितसहित २७ अंक जोड्दै पाँचौं स्थानमा छ ।