काठमाडौं (हाम्रो खेलकुद) – प्रधानमन्त्री कप महिला टि२० राष्ट्रिय प्रतियोगितामा आइतबार नेपाल एपिएफ क्लब र मधेश प्रदेश विजयी भएका छन् । लगातार दोस्रो जित हात पार्नेक्रममा एपिएफले बागमती प्रदेशलाई ४३ रनले पराजित गर्यो ।

जनता क्रिकेट पार्क इटहरीमा टस हारेर पहिला ब्याटिङको निम्तो पाएको एपिएफले निर्धारित २० ओभरमा ४ विकेट गुमाउँदै १ सय ३६ रन बनायो । एपिएफकी इन्दु बर्माले २७ बलमा ३ चौका र १ छक्कासहित सर्वाधिक ३८ रन बनाइन् । कप्तान सीता रानामगर २९ बलमा ५ चौकासहित ३६, ज्योति पाण्डे १५ र राजमती ऐरी ९ रनमा आउट भइन् । नेरी थापा १९ बलमा २ चौकासहित १९ रनमा अविजित रहिन् ।

बागमतीकी अश्मिना कर्माचार्य, खुशी डंगोल, मनिषा उपाध्याय र सोनी पाख्रिनले एक एक विकेट लिए । जितको लागि १ सय ३७ रनको विजयी लक्ष्य पछ्याएको बागमतीले निर्धारित २० ओभरमा ९ विकेट गुमाउँदै ८३ रन बनायो । बागमतीकी ओपनर हेलिसा गुरुङ २२, कन्चन श्रेष्ठ ११, सोनी पाख्रिन १३ र अश्मिना कर्माचार्य १० रनमा आउट भइन् ।

एपिएफकी निशा भट्टले ४ ओभरमा ११ रन खर्चेर ३ विकेट लिइन् । सीता रानामगरले ४ ओभरमा ११ रन खर्चेर २ विकेट लिइन् । समूह ए मा रहेको एपिएफ दुई खेलमा ४ अंकका साथ शीर्ष स्थानमा छ ।

अर्को खेलमा मधेश प्रदेशले कर्णाली प्रदेशलाई ८ विकेटले रहायो । जितको लागि ८० रनको विजयी लक्ष्य पछ्याएको मधेशले १०.२ ओभरमा २ विकेट गुमाउँदै पूरा गर्यो । मधेशको जितमा अनुराधा चौधरी ३५ बलमा ५ चौकासहित सर्वाधिक ३८ रन बनाइन् । प्रतिमा शाह १८ रनमा अविजित रहिन् । कर्णालीको बिना थापाले दुई विकेट लिइन् ।

त्यसअघि टस जितेर पहिला ब्याटिङ थालेको कर्णालीले निर्धारित २० ओभरमा ६ विकेट गुमाउँदै ७९ रन बनायो । कर्णालीको तृर्सना विश्वकर्माले ३० बलमा सर्वाधिक १५ रन बनाइन् । किरण कुँवर १३, यमुना थारु ९, रमा बुढाथोकी ५ र अन्जु गुरुङले १३ रन जोडिन् । मधेशकी भुमी सिंहले ४ ओभरमा १९ रन खर्चेर ४ विकेट लिइन् । अमिरान निशाले दुई विकेट लिइन् ।