एजेन्सी – अष्ट्रेलिया प्रमुख ब्याटर स्टिभ स्मिथले बिग ब्यास लिगमा सिड्नी सिक्सर्सबाट एडिलेड स्ट्राइकर्सविरुद्ध सानदार शतक प्रहार गरेका छन् । बिग ब्यास लिगको ४५ औं खेलमा इन्टरनेशनल स्पोर्ट्स स्टेडियम कफ हार्बरमा टस हारेर पहिला ब्याटिङ थालेको सिड्नी सिक्सर्सले निर्धारित २० ओभरमा ५ विकेट गुमाउँदै २ सय ३ रन बनायो ।

सिड्नीका स्टिभ स्मिथले ५६ बलमा ५ चौका र ७ छक्कासहित १ सय १ रनको सानदार शतकीय इनिङ खेले । स्मिथ रन आउट भएका थिए । स्मिथले बेन्जामिन मानेन्टीलाई छक्का हान्दै ५६ बलमा शतक पूरा गरेका थिए ।

स्मिथको टि२० करिअरको दोस्रो शतक हो । स्मिथले टि२० क्रिकेटमा यसअघि सन् २०१७ मा इन्डियन प्रिमियर लिग (आइपिएल) मा राइजिङ पुणे सुपरजायन्ट्सबाट गुजरात लायन्सविरुद्ध ५४ बलमा ८ चौका र ५ छक्कासहित १ सय १ रनको शतकीय इनिङ खेलेका थिए ।

सिड्नी सिक्सर्सबाट शतक प्रहार गर्ने स्मिथ पहिलो खेलाडी समेत बनेका छन् । स्मिथले टेस्ट र ओडिआई क्रिकेटमा लगातार उत्कृष्ट प्रदर्शन गर्दै आएका छन् । टेस्टका वर्तमान समयका सर्वोत्कृष्ट ब्याटरको रुपमा चिनिन्छन् । गत नोभेम्बरमा घरेलु मैदानमा भएको टि२० विश्वकपमा स्मिथको प्रदर्शनलाई लिएर आलोचना भएको थियो ।

स्मिथले अष्ट्रेलियाबाट ६३ टि२० आई खेलमा चार अर्धशतक सहित १२५.२१ को स्ट्राइक रेटमा १ हजार ८ रन बनाएका छन् । टि२० आई क्रिकेटमा स्मिथको उत्कृष्ट प्रदर्शन २०१५ मा कार्डिफमा इंग्ल्यान्डविरुद्ध ९० रन थियो ।