एजेन्सी – दक्षिण अफ्रिकामा जारी आइसिसी वुमन्स यू१९ टि२० विश्वकपमा रुवान्डाले टेस्ट टोली जिम्बावेलाई ३९ रनले पराजित गरेको छ । पहिलो पटक क्रिकेटतर्फ विश्वकप खेलेको रुवान्डाले जिम्बावेलाई स्तब्ध पार्दै पहिलो जितका साथ इतिहास रचेको छ ।

जितको लागि १ सय २० रनको विजयी लक्ष्य पछ्याएको जिम्बावे १८.४ ओभरमा ८० रनमा अल आउट भयो । जिम्बावेको लागि नताशा मटोम्बा र केली एन्डिरायाले सर्वाधिक २०–२० रन बनाए ।

अन्य कुनैपनि ब्याटरले राम्रो प्रदर्शन गर्न सकेनन् । रुवान्डाकी मध्यगतिकी बलर हेनरीएट इसिम्वेले १९ औं ओभरमा लगातार चार विकेट लिएकी थिइन् । ह्याट्रिकसहित लगातार चार विकेट लिँदै उनले ऐतिहासिक जित पक्का गरिन् । इसिम्वेले ३.४ ओभरमा १३ रन खर्चेर ४ विकेट लिइन् । जुरुफात इसिम्बेले ४ ओभरमा २७ रन खर्चेर २ विकेट लिइन् ।

त्यसअघि नर्थ वेस्ट ग्राउन्ड नम्बर १ मा टस हारेर पहिला ब्याटिङ थालेको रुवान्डाले निर्धारित २० ओभरमा ८ विकेट गुमाउँदै १ सय १९ रन बनायो । रुवान्डाको लागि कप्तान जिसेले इसिम्वेले २३ बलमा ५ चौकासहित सर्वाधिक ३४ रन बनाइन् । अर्की ओपनर सिन्थिया टुईजेरे ४४ बलमा २ चौकासहित ३० रन बनाइन् ।

जिम्बावेकी चिपो मोयोले ३ ओभरमा २२ रन खर्चेर ३ विकेट लिइन् । पहिलो पटक भई रहेको यू-१९ महिला विश्वकपमा जिम्बावे समूह बी मा दुबै खेलमा हारका साथ पुछारमा छ ।

रुवान्डा २ खेलमा १ मा जितसहित तेस्रो स्थानमा छ । सुरुवाती खेल जित्दै इंग्ल्यान्ड शीर्ष र पाकिस्तान दोस्रो स्थानमा छन् । यस विश्वकपमा चार समूहमा गरि १६ टोलीको सहभागीता छ । नेपाल भने एसिया क्षेत्र छनोटबाट बाहिरिएको थियो