एजेन्सी – युवा ओपनर शुभमन गिलको सानदार दोहोरो शतकमा भारतले पहिलो ओडिआई खेलमा न्युजिलयान्डलाई ३ सय ५० रनको विशाल लक्ष्य दिएको छ । राजिव गान्धी इन्टरनेशनल स्टेडियम हैदराबादमा टस जितेर पहिला ब्याटिङ थालेको भारतले निर्धारित ५० ओभरमा ८ विकेट गुमाउँदै ३ सय ४९ रन बनायो ।

भारतका शुभमन गिलले १ सय ४९ बलमा १९ चौका र ९ छक्कासहित २ सय ८ रनको सानदार दोहोरो शतकीय इनिङ खेले । गिल ओडिआईमा दोहोरो शतक प्रहार गर्ने विश्वका आठौं ब्याटर हुन् । भारतका पाँचौं खेलाडी बनेका छन् ।

भारतबाट रोहित शर्माले सर्वाधिक तीन पटक दोहोरो शतक प्रहार गरेका छन् । ओडिआई क्रिकेट इतिहासको यो १० औं दोहोरो शतक हो । त्यस्तै रोहितसँगै विरेन्द्र सहवाग, सचिन तेन्दुलकर, ईशान किशन र गिलले दोहोरो शतक हानेका हुन् ।

न्युजिल्यान्डका मार्टिन गुप्टिल, वेस्टइन्डिजका क्रिस गेल र पाकिस्तानका फखार जमानले पनि ओडिआईमा दोहोरो शतक प्रहार गरेका छन् ।

अन्य भारतीय ब्याटरको भने प्रदर्शन राम्रो हुन सकेन । कप्तान रोहित शर्मा ३८ बलमा ४ चौका र २ छक्कासहित ३४ रनमा आउट भए । विराट कोहली ८, ईशान किशन पाँच, सूर्यकुमार यादव ३१, हार्दिक पान्ड्या २८, वासिन्टन सुन्दर १२ र शार्दुल ठाकुर ३ रनमा आउट भए ।

न्युजिल्यान्डका तीव्र गतिका बलर हेनरी शिफ्ले र डर्याल मिचेलले दुई दुई विकेट लिए । लोकी फर्गुसन, मिचेल सान्टनार र ब्लेयर टिकनरले एक एक विकेट हात पारे ।