एजेन्सी – कप्तान एन्ड्रयु बलबर्नी र युवा ब्याटर ह्यारी टेक्टरको शतकका बाबजुद आयरल्यान्ड पहिलो ओडिआई खेलमा घरेलु टोली जिम्बावेसँग डकवर्थ लेविस पद्धतिको आधारमा तीन विकेटले पराजित भएको छ । सँगै तीन ओडिआई खेलको सिरिजमा जिम्बावेले १–० को अग्रता लिएको छ ।

वर्षाले प्रभावित खेलमा डकवर्थ लेविस पद्धतिको आधारमा जिम्बावेले २ सय १४ रनको विजयी लक्ष्य निर्धारित ३७ ओभरमा ७ विकेट गुमाउँदै पूरा गर्यो । जिम्बावेले २ सय ८९ रनको विजयी लक्ष्य पछ्याउनेक्रममा ३३.३ ओभरमा १७५–४ को अवस्थामा खेल वर्षाको कारण रोकिएको थियो ।

जिम्बावेका रायन बर्लले ४१ बलमा ६ चौका र २ छक्कासहित सर्वाधिक ५९ रन बनाए । सिकन्दर राजा ४५ बलमा ४ चौका र १ छक्कासहित ४३ र कप्तान क्रेग इर्विन ३८ रनमा आउट भए । आयरल्यान्डका मार्क आदिर र ग्राहम हमेले दुई दुई विकेट लिए ।

त्यसअघि हरारे स्पोर्ट्स क्लबमा टस हारेर पहिला ब्याटिङ थालेको आयरल्यान्डले निर्धारित ५० ओभरमा ४ विकेट गुमाउँदै २ सय ८८ रन बनाएको थियो । आयरल्यान्डका एन्ड्रयु बलबर्नीले १ सय ३७ बलमा १३ चौका र ३ छक्कासहित सर्वाधिक १ सय २१ रनमा रिटायर्ट हर्ट भए ।

ह्यारी टेक्टरले १ सय ९ बलमा ८ चौका र १ छक्कासहित १ सय १ रनको अविजित शतकीय इनिङ खेले । तेस्रो विकेटका लागि बलबर्नी र टेक्टरले २ सय १२ रनको सानदार दोहोरो शतकीय साझेदारी गरेका थिए । बलबर्नीको ओडिआई करिअरको आठौं र टेक्टरको तेस्रो शतक हो ।

जिम्बावेका भिक्टर न्याउचीले सर्वाधिक दुई विकेट लिए । दोस्रो खेल शनिबार र तेस्रो खेल सोमबार हुनेछ ।