एजेन्सी – पाकिस्तानी अनुभवी ब्याटर इफ्तिखार अहमदले बंगलादेश प्रिमियर लिगमा फोच्र्युन बरिशालबाट रंगपुर राइडर्सविरुद्ध सानदार शतक प्रहार गरेका छन् । अहमदको शतकको सहयोगमा बरिशालले राइडर्सलाई ६७ रनले पराजित गरेको छ ।

जहूर अहमेद चौधरी स्टेडियममा टस हारेर पहिला ब्याटिङ थालेको बरिशालले निर्धारित २० ओभरमा ४ विकेट गुमाउँदै २ सय ३८ रन बनायो । इफ्तिखार अहमदले ४५ बलमा ६ चौका र ९ छक्कासहित १ सय रनको शतकीय इनिङ खेले । उनको यो टि२० करिअरको पहिलो शतक हो ।

त्यस्तै कप्तान सकिब अल हसनले ४३ बलमा ९ चौका र ६ छक्कासहित ८९ रनमा अविजित रहे । पाँचौं विकेटका लागि सकिब र इफ्तिखारले १ सय ९२ रनको अविजित विश्व कीर्तिमानी साझेदारी गरेका थिए । जुन टि२० क्रिकेटमा पाँचौं विकेटका लागि भएको उच्च साझेदारी हो ।

यसअघि पाँचौं विकेटका लागि टि२० क्रिकेटमा २०२० मा इंग्ल्यान्डको टि२० ब्लास्टमा बर्मिंघम ब्रेसका ड्यान मोस्ली र एडम होसले नर्थह्याम्प्टनशायरविरुद्ध १ सय ७१ रनको शतकीय साझेदारी गरेका थिए । रंगपुरका हसन महमुद र हरिस रौफले दुई दुई विकेट लिए ।

जितको लागि २ सय ३९ रनको विजयी लक्ष्य पछ्याएको रंगपुरले निर्धारित २० ओभरमा ९ विकेट गुमाउँदै १ सय ७१ रन बनायो । शमिम हुसेनले २४ बलमा ३ चौका र ४ छक्कासहित सर्वाधिक ४४ रन बनाए । बरिशालका मेहेदी हसन मिराजले ४ ओभरमा २६ रन खर्चेर ३ विकेट लिए । मोहम्मद वासिम जुयिनर र कमरुल इस्लाम दुई दुई विकेट लिए ।