एजेन्सी – भारतले तेस्रो तथा अन्तिम ओडिआई खेलमा न्युजिल्यान्डलाई ९० रनले हराउँदै आइसिसी वरियतामा शीर्षस्थानमा उक्लिएको छ । भारतले तीन ओडिआई खेलको सिरिजमा क्लिनस्विप गरेको छ ।

जितको लागि ३ सय ८६ रनको विजयी लक्ष्य पछ्याएको न्युजिल्यान्ड ४१.२ ओभरमा २ सय ९५ रनमा अल आउट भयो । न्युजिल्यान्डका ओपनर डेभन कन्वेले १ सय बलमा १२ चौका र ८ छक्कासहित १ सय ३८ रनको सानदार शतकीय इनिङ खेलेपनि टोलीको हार टार्न सकेनन् । भारतले न्युजिल्यान्डलाई पछि पार्दै विश्व ओडिआई वरियतामा शीर्ष स्थानमा उक्लिएको छ ।

ओपनर फिन एलेन शून्यमै बोल्ड भएपनि दोस्रो विकेटका लागि कन्वे र हेनरी निकोलसले १ सय ६ रनको शतकीय साझेदारी गरेका थिए । हेनरी ४० बलमा ३ चौका र २ छक्कासहित ४२ रनमा आउट भए । डर्याल मिचेलले कन्वेसँग ६६ रनको साझेदारी गरेपछि २५ ओभरमा १८४-२ को बलियो अवस्थामा थियो ।

तर त्यसपछि शार्दुल ठाकुरको बाउन्सर बलमा मिचेल २४ रनमा ईशान किशनबाट क्याच आउट भए । लगत्तै कप्तान टम लाथम गोल्डेन डक आउट भए । त्यसपछि भने लगातार विकेट गुमायो । ग्लेन फिलिप्स ५, माइकल ब्रेसवेल २६ र मिचेल सान्टनार ३४ रनमा आउट भए ।

भारतका शार्दुल ठाकुर र कुलदीप यादवले तीन तीन विकेट लिए । युजभेन्द्र चहल दुई, हार्दिक पान्ड्या र उमरान मलिकले एक एक विकेट लिए ।

त्यसअघि इन्डोरमा टस हारेर पहिला ब्याटिङको निम्तो पाएको भारतले निर्धारित ५० ओभरमा ९ विकेट गुमाउँदै ३ सय ८५ रन बनाएको थियो । भारतका ओपनर शुभमन गिलले ७८ बलमा १३ चौका र ५ छक्कासहित १ सय १२ रनको सानदार शतकीय इनिङ खेले । गिलले न्युजिल्यान्डविरुद्ध पहिलो ओडिआई खेलमा २ सय ८ रनको सानदार दोहोरो शतकीय इनिङ खेलेका थिए ।

कप्तान रोहित शर्मा ८५ बलमा ९ चौका र ६ छक्कासहित १ सय १ रनमा आउट भए । रोहितको यो ३० औं ओडिआई शतक हो । पहिलो विकेटका लागि शुभमन गिल र रोहित शर्माले २६.१ ओभरमा २ सय १२ रनको सानदार दोहोरो शतकीय साझेदारी गर्दै विशाल योगफलको आधार तय गरेका थिए ।

हार्दिक पान्ड्या ३८ बलमा ३ चौका र ३ छक्कासहित ५४ रनमा आउट भए । विराट कोहली २७ बलमा ३ चौका र १ छक्कासहित ३६, ईशान किशन १७, सूर्यकुमार यादव १४, वासिन्टन सुन्दर ९ र शार्दुल ठाकुर २५ रनमा आउट भए ।

न्युजिल्यान्डका ज्याकुफ डफीले १० ओभरमा १ सय रन खर्चेर ३ विकेट लिए । ब्लेयर टिकनरले १० ओभरमा ७६ रन खर्चेर ३ विकेट लिए । भारत पहिलो खेलमा १२ रन र दोस्रो खेलमा ८ विकेटले विजयी भएको थियो । भारत र न्युजिल्यान्डबीच अव तीन टि२० आई खेलको सिरिज हुनेछ । पहिलो टि२० खेल शुक्रबार राँचीमा हुनेछ ।