एजेन्सी – वर्तमान समयका विश्व क्रिकेटका सर्वाधिक चर्चित चार खेलाडी (फ्याब फोर) नै अन्तर्राष्ट्रिय क्रिकेट परिषद् (आइसिसी) को २०२२ को टेस्ट टोलीमै पर्न सकेनन् ।

आइसिसी टेस्ट टिम अफ दि इयर २०२२ को घोषणा गर्दा फ्याब फोर ब्याटर भारतीय विराट कोहली, इंग्ल्यान्डका जो रुट, न्युजिल्यान्डका केन विलियम्सन र अष्ट्रेलियाका स्टिभ स्मिथ भने छैनन् । विराट कोहली, जो रुट, केन विलियम्सन र स्टिभ स्मिथलाई वर्तमान समयका प्रमुख चार ब्याटर मानिन्छ ।

त्यसैले यी चार ब्याटरलाई फ्याब फोर भन्ने गरिन्छ । इंग्ल्यान्डका बेन स्टोक्स कप्तान हुँदा बाबर आजम देखि भारतीय ऋषभ पन्त सम्मका खेलाडी परेका छन् ।

जो रुट २०२२ मा सर्वाधिक रन बनाउने सूचिमा दोस्रो स्थानमा छन् । रुटले १५ खेलमा ५ शतक र २ अर्धशतकसहित १ हजार ९८ रन बनाएका छन् । शीर्ष स्थानमा बाबर आजम ९ खेलमा ४ शतक र ७ अर्धशतकसहित १ हजार १ सय १ सय ८४ रन बनाएका थिए ।

त्यस्तै स्टिभ स्मिथले ११ खेलमा २ मा शतक र ५ मा अर्धशतकसहित ८ सय ७६ रन बनाएका छन् । २०२२ मा सर्वाधिक रन बनाउने ब्याटरमा स्मिथ छैटौं स्थानमा छन् । विराट कोहली र केन विलियम्सनको भने प्रदर्शन कमजोर थियो । कोहलीले ६ खेलमा २ सय ६५ रन बनाएका थिए ।

केन विलियम्सनले तीन खेलमा एक दोहोरो शतकसहित २ सय रन बनाएका थिए । आइसिसीको उत्कृष्ट टोलीको शीर्ष चार ब्याटरमा अष्ट्रेलियाका उस्मान खवाजा, मार्नस लाबुसेन वेस्टइन्डिजका क्रेग ब्रेथवेट र पाकिस्तानका बाबर आजम छन् ।

यस वर्ष सानदार प्रदर्शन र कप्तानी गरेका बेन स्टोक्स आइसिसीका कप्तान रहेका छन् । बेन स्टोक्सको कप्तानीमा इंग्ल्यान्डले फरक किसिमको टेस्ट क्रिकेट प्रस्तुत गरेको छ । स्टोक्सले १५ खेलमा २ शतक र ४ अर्धशतकसहित ८ सय ७० रन बनाएका छन् । त्यस्तै उत्कृष्ट प्रदर्शन गरेका जोनी बेयरस्टोले १० खेलमा ६ शतकसहित १ हजार ६१ रन बटुलेका छन् ।

आइसिसी टेस्ट टिम अफ द इयर २०२२

उस्मान खवाजा, क्रेग व्रेथवेट, मार्नस लाबुसेन, बाबर आजम, जोनी बेयरस्टो, बेन स्टोक्स (कप्तान), ऋषभ पन्त (विकेटकिपर), प्याट कमिन्स, कागिसो रबाडा, नाथन लायन र जेम्श एन्डरसन ।