एजेन्सी – इंग्ल्यान्डले दक्षिण अफ्रिकामा जारी आइसिसी महिला यू-१९ विश्वकपको दोस्रो सेमिफाइनल खेलमा अष्ट्रेलियामाथि तीन रनको रोमान्चक जित हात पार्दै फाइनलमा पुगेको छ । पहिलो पटक भएको यू-१९ महिला विश्वकपको फाइनलमा भारत र इंग्ल्यान्डबीच प्रतिस्पर्धा हुनेछ ।
जितको लागि एक सय रनको विजयी लक्ष्य पछ्याएको अष्ट्रेलिया १८.४ ओभरमा ९६ रनमा अल आउट भयो । अष्ट्रेलियाकी एमी स्मिथले २६ बलमा ३ चौकासहित सर्वाधिक २६ रन बनाइन् । एला हेवर्ड १६ र क्लेयर मूरले २० रन बनाइन् ।
अन्य कुनैपनि अष्ट्रेलिया ब्याटरले दोहोरो अंकमा रन बनाउन सकेनन् । इंग्ल्यान्डकी हन्ना बेकेरले ४ ओभरमा १० रन खर्चेर ३ विकेट लिइन् । ग्रेस स्क्रिवेंसले दुई विकेट लिइन् ।
त्यसअघि टस जितेर पहिला ब्याटिङ थालेको इंग्ल्यान्ड १९.५ ओभरमा ९९ रनमा अल आउट भयो । इंग्ल्यान्डकी एलेक्सा स्टोनहाउसले ३३ बलमा २ चौकासहित सर्वाधिक २५ रन बनाइन् । ओपनर तथा कप्तान ग्रेस स्क्रिवेंसले २० बलमा २ चौकासहित २०, सेरेन स्मेल १० र जोसी ग्रोव्सले १५ रन बनाइन् ।
अष्ट्रेलियाकी म्यागी क्लार्कले ३.५ ओभरमा १५ रन खर्चेर ३ विकेट लिइन् । एला हेवर्ड ४ ओभरमा २५ रन खर्चेर ३ विकेट लिइन् । सियाना जिगेरले ४ ओभरमा १३ रन खर्चेर ३ विकेट लिइन् । फाइनल आइतबार हुनेछ । पहिलो सेमिफाइनलमा भारतले न्युजिल्यान्डलाई ८ विकेटले हराएको थियो ।
