एजेन्सी – भारतले दक्षिण अफ्रिकामा जारी महिला यू-१९ महिला विश्वकपको फाइनलमा इंग्ल्यान्डलाई ७ विकेटले हराउँदै उपाधि जितेको छ । पहिलो पटक भएको महिला यू–१९ विश्वकप उपाधि जित्दै भारतले इतिहास रचेको छ ।

जितको लागि ६९ रनको विजयी लक्ष्य पछ्याएको भारतले १४ ओभरमा तीन विकेट गुमाउँदै पूरा गर्यो । भारतकी सौम्या तिवारीले ३७ बलमा ३ चौकासहित सर्वाधिक २४ रनमा अविजित रहिन् । कप्तान शफाली बर्मा ११ बलमा १ चौका र १ छक्कासहित १५ रनमा आउट भइन् ।

गाेंगडी तृषाले २९ बलमा ३ चौकासहित २४ रनमा आउट भइन् । इंग्ल्यान्डकी हन्ना बेकेर ग्रेस स्क्रिभेन्स र एलेक्सा स्टोनहाउस एक एक विकेट लिए ।

त्यसअघि सेनवेस पार्कमा टस हारेर पहिला ब्याटिङको निम्तो पाएको इंग्ल्यान्ड १७.१ ओभरमा ६८ रनमा अल आउट भयो । इंग्ल्यान्डकी रियाना म्याकडोनाल्ड गेले २४ बलमा ३ चौकासहित सर्वाधिक १९ रन बनाइन् । नियाम हल्याण्ड १०, एलेक्सा स्टोनहाउस र सोफिया स्मालेले ११–११ रन बनाइन् ।

भारतकी तितास साधुले ४ ओभरमा ६ रन खर्चेर २ विकेट लिइन् । अर्चना देवीले ३ ओभरमा १७ रन खर्चेर २ विकेट लिइन् । पाश्रर्वी चोपडा ४ ओभरमा १३ रन खर्चेर २ विकेट लिइन् । महिला यू–१९ विश्वकपमा कुल १६ टोलीको सहभागीता थियो ।

भारतले सेमिफाइनल खेलमा न्युजिल्यान्डलाई ८ विकेटले हराउँदै फाइनलमा स्थान बनाएको थियो । इंग्ल्यान्डले अष्ट्रेलियालाई सेमिफाइनलमा तीन रनले हराएको थियो ।