एजेन्सी – स्पिनर सामु कमजोर सावित भएसँगै न्युजिल्यान्डले दोस्रो टि२० आई खेलमा घरेलु टोली भारतलाई १ सय रनको सामान्य लक्ष्य दिएको छ । लखनऊमा टस जितेर पहिला ब्याटिङ थालेको न्युजिल्यान्डले निर्धारित २० ओभरमा ८ विकेट गुमाउँदै ९९ रन बनायो ।
न्युजिल्यान्डका कप्तान मिचेल सान्टनार २३ बलमा १ चौकासहित सर्वाधिक २० रनमा अविजित रहे । मार्क च्यापम्यान र माइकल ब्रेसवेलले १४–१४ रन बनाए । भारतको स्पिन आक्रामण सामु न्युजिल्यान्डका ब्याटर निरिह बने । चौथो ओभरको तेस्रो बलमा ओपनर फिन एलेन युजभेन्द्र चहलको बलमा ११ रनमा बोल्ड भए । फिन एलेनले १० बलमा २ चौका प्रहार गरे ।
अर्का स्पिनर वासिन्टन सुन्दरको बलमा डेभन कन्वे ११ रनमै ईशान किशनबाट क्याच आउट भए । उनी पनि रिभरस्वीपकै धुनमा आउट भएका थिए । पार्ट टाइम स्पिनर दीपक हुडाले ग्लेन फिलिप्सलाई ५ रनमा बोल्ड गरे । स्पिनर सहयोगी पिचमा कुनैपनि न्युजिल्यान्डका ब्याटर क्रिजमा टिक्न सकेनन् ।
कुलदीप यादवले डर्याल मिचेललाई ८ रनमा बोल्ड गरे । मार्क च्यापम्यान २१ बलमा १४ रन बनाउँदै रन आउट भए । भारतका अर्शदीप सिंहले २ ओभरमा ७ रन खर्चेर २ विकेट लिए । कुलदीप यादवले ४ ओभरमा १७ रन खर्चेर १ विकेट लिए । युजभेन्द्र चहलले २ ओभरमा १ मेडनसहित ४ रन खर्चेर १ विकेट लिए ।
दीपक हुडाले ४ ओभरमा १७ रन खर्चेर १ विकेट लिए । वासिन्टन सुन्दरले ३ ओभरमा १७ रन खर्चेर १ विकेट लिए । हार्दिक पान्ड्याले ४ ओभरमा २५ रन खर्चेर १ विकेट लिए । तीन टि२० आई खेलको सिरिजमा न्युजिल्यान्ड १–० ले अघि छ ।
