एजेन्सी – भारतले दोस्रो टि२० आई खेलमा न्युजिल्यान्डविरुद्ध एकना क्रिकेट स्टेडियम लखनऊमा पिच स्लो र टर्निङ बनाएको भन्दै क्यूरेटरलाई पदबाट हटाएको छ । आइतबार भारतले १ सय रनको सामान्य लक्ष्य एक बल अगाडि ४ विकेट गुमाउँदै पूरा गरेको थियो ।

खेलपछि कप्तान हार्दिक पान्ड्याले पिचको आलोचना गर्दै झड्का दिने खालको बताएका थिए । न्युजिल्यान्डले टस जितेर पहिला ब्याटिङ रोज्दै २० ओभरमा ८ विकेटको क्षतिमा ९९ रन बनाएको थियो । कुल ४० ओभरको खेलमा न्युजिल्यान्डले १७ र भारतले १३ गरि कुल ३० ओभर स्पिनरले गरेका थिए । खेलमा कुनैपनि छक्का लागेको थिएन । भारतले ८ र न्युजिल्यान्डले ६ चौका मात्रै प्रहार गरेका थिए ।

‘ती क्युरेटरलाई पदबाट हटाइएको छ । उनको स्थानमा अनुभवी क्युरेटर सञ्जीव कुमार अग्रवाललाई जिम्मेवारी दिईएको छ । एक महिनामा हामी यो परिवर्तन गर्नेछौं’, उत्तर प्रदेश क्रिकेट संघको स्रोतलाई बताउँदै पिटआईले जनाएको छ ।

‘भारत र न्युजिल्यान्डको खेल खेल्नुअघि सेन्टर पिचमा धेरै घरेलु क्रिकेट खेलिएको थियो । अन्तर्राष्ट्रिय खेलको लागि एकदुई पिच छाड्नु पर्ने थियो’, स्रोतले पिटआईलाई भनेको छ । अग्रवाललाई गतवर्ष अक्टोबरमा बंगलादेशले क्युरेटर पदबाट हटाएको थियो । उनले बिसिसिआईका अनुभवी क्युरेटर तपोश चटर्शीसँग मिलेर काम गर्नेछन् ।

भारतीय मिडयाका अनुसार भारतको टिम म्यानेजमेन्टले अन्तिम समयमा पिच परिवर्तन गर्न क्युरेटरलाई आग्रह गरिएको थियो । द इन्डियन एक्सप्रेसका अनुसार क्युरेटरले कालो माटोको दुई पिच पहिल्लानै तयार पारि सकेका थिए । तर खेलको तीन दिन अघि भारतीय टोली व्यवस्थापनले पिच परिवर्तन गर्न आग्रह गरेका थिए । भारतको टिम व्यवस्थापनले रातो माटोले बनाएको नयाँ पिच तयार पार्न भनिएको थियो । तर उक्त छोटो समयमा पिच तयार हुन सकेन । स्वलो बन्न पुगेको थियो ।

इन्डियन प्रिमियर लिग (आइपिए) मा यस मैदान लखनऊ सुपर जायन्ट्सको घरेलु मैदानको रुपमा प्रयोग गर्नेछ । भारत र न्युजिल्यान्डबीचको तीन टि२० आई खेलको सिरिज १–१ को बराबरी अवस्थामा छ । तेस्रो तथा निर्णायक खेल अहमदाबादमा बुधबार हुनेछ ।