काठमाडौं (हाम्रो खेलकुद) – पोखरामा जारी नेपाल क्रिकेट संघ (क्यान) को बोर्ड बैठकमा ६ केन्द्रिय सदस्यहरुले अध्यक्ष चतुरबहादुर चन्दसहित कार्यसम्पादन समितिको राजीनामा माग गर्दै बैठक छाडेका छन् । बैठक विहान १० बजे सुरु हुनुपर्ने थियो । तर असन्तुष्ट ६ सदस्य ढिलो आएपछि एक बजे सुरु भएको बुझिएको छ ।

६ केन्द्रीय सदस्यले नेपाल टि२० लिगमा भएका विविध गल्तीको जिम्मेवारी नेतृत्वले लिनुपर्ने बताउँदै अध्यक्षसहित कार्यसम्पादन समितिको राजीनामा माग गर्दै पत्र बुझाएर बैठक छाडेका छन् । त्यसपछि भोजनको लागि बैठक रोकिएको छ।

केन्द्रीय सदस्यहरु ऋषिराम गौतम, दाउद अन्सारी, संजयराज सिंह, करण महतरा क्षेत्री, छुम्बी लामा र धर्मराज गिरीले राजीनामा माग गर्दै बोर्ड बैठक छाडेका छन् । अमितवीर पाण्डे भने अस्वस्थका कारण बैठकमा गएका छैनन् । अमितले भने पत्र बुझाएकोमा सहमित जनाउँदै हस्ताक्षर गरेका छन् ।

‘हामीले पहिला मागेको राजीनामालाई नै निरन्तरता दियौं । त्यहिँ आसायसहितको एउटा पत्र पनि बुझायौं । जुन अध्यक्षको राजीनामा मागेका छौं त्यहिँको अध्यक्षतामा बैठक बस्न कुन नैतिकताले मिल्छ र । अव हेरौं उनीहरुको निर्णय के हुन्छ । हामीलाई छलफल गछौं भन्नु भएको छ’, दाउद अन्सारीले हाम्रो खेलकुदसँग भने ।

राजीनामा नआएमा सम्बन्धित निकाएमा जाने अन्सारीले बताए । ‘आज हामीले जुन पत्र बुझाएका छौं त्यसको प्रतिलिपि सम्बन्धित निकायमा बुझाउँछौं’, उनले भने । आज बोर्ड बैठकमा १७ एजेन्डामाथि छलफल गर्ने भनिएको छ ।

चार महिनापछि बस्न लागेको बोर्ड बैठकमा नेपाल टि२० लिग विवाद, मुख्य प्रशिक्षक नियुक्ति, सन्दीप लामिछाने निलम्बन फुकुवा, आइसिसी विश्वकप लिग-२ त्रिकोणात्मक ओडिआई सिरिज आयोजना, एसिसी प्रिमियर कप नेपालमा आयोजना लगायत १७ एजेन्डा छन् ।

यू-१९ विश्वकप एसिया छनोट खेल्ने टोली, यू-१९ को कप्तान र उपकप्तान, वार्षिक साधरण सभा, संघको विशेष साधरण सभा र निर्वाचन तथा २०२३ को खेलाडी वर्गिकरण लगायत पक्षहरु छन् ।

‘उनीहरुले हामीलाई एजेन्डा १५ गते दिने भनेका थिए । त्यो हामीले पढ्न पनि आएनौं । हामीलाई ९-१० बजे राती पठाएका थिए । हामी अव बैठकमा बस्दैनौं । हामीले कार्यसम्पादन समितिको राजीनामा मागेका छौं । गर्भनिङ काउन्सिलाई कारबाही गर भनेका छौं’ उनले त्यसैमा थपे, ‘विश्वमै नेपाली क्रिकेटले जुन बदनामी खेपेको छ । त्यसको जिम्मेवारी कसै न कसैले त लिनुपर्छ नि । गल्ती भयो गल्ती भयो भनेर मात्रै हुँदैन। सन्दीपले गल्ती गर्दा कारबाही हुने अध्यक्षलाई चाहिँ नहुने । जसले नियम कानुन अनुसार काम गर्दैनन् उनीहरुलाई कारबाही हुनुपर्छ’, उनले भने । उनले अव काठमाडौं फर्किएर सम्बन्धित निकायलाई पत्र बुझाएने बताए ।