एजेन्सी – इंग्ल्यान्डका दुई महिला विवाहित जोडीले अर्को महिना दक्षिण अफ्रिकामा हुने टि२० विश्वकप क्रिकेट खेल्दैछन् । विश्वकप खेल्नुअघि उक्त दुई क्रिकेटरले जर्सीमा आफ्नो नाम परिवर्तन गरेका छन् ।
इंग्ल्यान्डका नाट सिभर र क्याथेरीन ब्रन्टले एकअर्कासँग गत वर्ष मे मा विवाह गरेका थिए । दक्षिण अफ्रिकामा हुने महिला टि२० विश्वकपको लागि यी दुई महिला क्रिकेटर जोडीले इंग्ल्यान्डबाट खेल्नेछन् । एकअर्कासँग विवाहपछि थर पनि परिवर्तन गरेर सिभर-ब्रन्ट राखेका छन् ।
३० वर्षीय अलराउन्डर नाटले आफ्नो जर्सीमा एन सिभर-ब्रन्ट लेखेकी छिन् । क्याथेरीनले के सिभर-ब्रन्ट लेखेकी छिन् । यी दुई जोडीले २०१९ अक्टोबरमा इन्गेजमेन्ट गर्दै २०२० सेप्टेम्बरमा विवाह गर्ने जनाएका थिए । तर कोरोना महामारीको कारण २०२२ मा विवाह गर्नुपरेको थियो । इन्गेजमेन्टपछि यी दुई जोडीले २०२० को टि२० विश्वकप र २०२२ को एकदिवसीय विश्वकप खेलि सकेका छन् ।
३० वर्षीय अलराउन्डर नाटले इंग्ल्यान्डबाट ८ महिला टेस्ट, ९४ महिला ओडिआई र १ सय ३ महिला टि२० आई खेलेकी छिन् । ३७ वर्षीय ब्रन्टले इंग्ल्यान्डबाट १४ महिला टेस्ट, १ सय ४१ महिला ओडिआई र १ सय ७ महिला टि२० आई खेलेकी छिन् । इंग्ल्यान्डको टोलीमा दुवै महत्वपूर्ण सदस्य हुन् ।
यी दुई विवाहित जोडीले २०१३ देखिसँगै इंग्ल्यान्डबाट खेल्दै आएका छन् । दक्षिण अफ्रिका दुई महिला क्रिकेटर डेन भान निकर्क र मारिजान कापपछि सँगै विश्वकप खेल्ने विवाहित जोडी समेत हुन् ।
यसपटक घरेलु मैदानमा हुने विश्वकपमा दक्षिण अफ्रिकाकी प्रमुख खेलाडी निकर्क भने टोलीमा छैनन् । निकर्क फिटनेस टेस्टको मापदण्ड पूरा गर्न नसक्दा टोलीमा पर्न सकिनन् ।
यी दुई विवाहित जोडी निकर्क र कापले गतवर्ष द हन्ड्रेडको प्लेयर अफ द सिरिज र उपाधि एकअर्कासँग बाँडेका थिए । यी दुई विवाहित जोडीले पनि सँगै विश्वकप खेलिसकेका छन् ।
महिला टि२० विश्वकप आगमी फेब्रुअरी १० देखि २६ सम्म दक्षिण अफ्रिकामा हुनेछ । समूह ए मा अष्ट्रेलिया, बंगलादेश, न्युजिल्यान्ड, दक्षिण अफ्रिका र श्रीलंका छन् । समूह बी मा इंग्ल्यान्ड, भारत, आयरल्यान्ड, पाकिस्तान र वेस्टइन्डिज छन् ।
