काठमाडौं (हाम्रो खेलकुद) – सेभेन थ्री स्पोर्ट्सले नेपाल टि२० लिग आयोजना गर्न नेपाल क्रिकेट संघ (क्यान) सँग सम्झौता रद्द गरेको छ । चौतफी आलोचना र विवादपछि सेभेन थ्री स्पोर्ट्सले आफैं सम्झौता रद्द गरेको जनाएको छ ।
सेभेन थ्री स्पोर्ट्सका संस्थापक जतिन अलुवालियाले क्यानसँग सम्झौता रद्द गरेको बताएका छन् । क्यान र सेभेन थ्री स्पोर्ट्सबीच नेपाल टि२० लिग आयोजना गर्न ८ वर्षका लागि ३३ करोड रुपैयाँ दिने सम्झौता भएको थियो । तर पहिलो संस्करणको लिगकै बीचमा जतिन नेपाल छाडेर भारत गएका थिए ।
त्यसपछि भने उनी नेपाल आएनन् । यता नेपाल टि२० लिगमा केहि फ्रेन्चाइज टोलीको मालिक पहिचान नभएको, म्याच र स्पट फिक्सिङ, खेलाडीले समयमै पैसा नभएको, अपार्दशिता लगायत विभिन्न विवाद उत्पन्न भएका थिए । नेपाल टि२० लिग विवादलाई लिएर नेपाल प्रहरीको केन्द्रिय अनुसन्धान ब्यूरो (सिआईबी) ले छानविन गरि रहेको छ । सेभेन थ्री नै स्पोट फिक्सिङको मुख्य योजनाकार भएको बुझिएको छ ।
स्पट फिक्सिङको आरोपमा नेपाली क्रिकेट टोलीका अलराउन्डर आदिल आलम र पूर्व क्रिकेटर मेहबुब आलम प्रकाउ परेका छन् । सिआईबीले क्यान र सेभेन थ्री दुबैमाथि अनुसन्धान गरि रहेको छ । जतिनले नेपाल टि२० लिग गराउन राखेपबाट अनुमति पाउन नसक्दा सम्झौता रद्द गरेको जनाएका छन् ।
नेपाल टि२० लिग पुष ९ देखि २६ सम्म टियु मैदानमा भएको थियो । लुम्बिनी अल स्टार्सले विराटनगर सुपर किंग्सलाई २४ रनले हराउँदै उपाधि जितेको थियो । नेपाल टि२० लिगमा १० जना स्पट फिक्सिङ गरेको पुष्टि भएको छ । नेपालका एक खेलाडीसहित कुल ४ जना स्पट फिक्सिङमा संलग्न छन् । एक जना खेलाडीसहित ६ जना विदेशी संलग्न रहेको बुझिएको छ ।
