एजेन्सी – भारतको सर्वाधिक लोकप्रिय घरेलु क्रिकेट रणजी ट्रफीको दोस्रो क्वाटरफाइनल खेलमा सौराष्ट्रका पार्थ भुतले पन्जाबविरुद्ध अविश्वसनीय शतक हानेका छन् ।

घरेलु टोली सौराष्ट्र टस जितेर पहिला ब्याटिङ गर्दै पहिलो इनिङमा ३ सय ३ रनमा अल आउट भयो । सौराष्ट्रका नवौं नम्बरका खेलाडी पार्थ भुतले १ सय ५५ बलमा ११ चौका र ४ छक्कासहित १ सय ११ रनको सानदार अविजित इनिङ खेले । भुत ब्याटिङमा आउँदा सौराष्ट्र ४४.४ ओभरमा १४७–७ कोे दयनीय अवस्थामा थियो ।

उनले आठौं विकेटका लागि ओपनर स्नेल पटेलसँग तीन बल खेल्दा कुनै रन जोड्न सकेनन् । ओपनर स्नेल पटेल १ सय ३१ बलमा ११ चौकासहित ७० रनमा आउट भए । नवौं विकेटका लागि भारतबाट खेलि सकेका तीव्र गतिका बलर चेतन सकारियासँग ९६ बलमा ६१ रनको साझेदारी गरे ।

दशौं तथा अन्तिम विकेटका लागि भुतले युभराजसिंह डोेडियासँग १ सय ५६ बलमा ९५ रनको साझेदारी गरे । जुन साझेदारीमा भुतले ७३ रन जोडेका थिए । स्पिनर भुतको यो आफ्नो करिअरकै पहिलो शतक हो । २५ वर्षीय भुतले ८ प्रथम श्रेणी, ८ लिष्ट ए र ४ टि२० आई खेल खेलेका छन् ।

रणजीमा उनले २०१९ मा उत्तरप्रदेशविरुद्ध डेब्यू गरेका थिए । पन्जाबले एक ओभरमा तीन रन बनाउँदा पहिलो दिनको खेल सकिएको छ । पहिलो दिन पहिलो क्वाटरफाइनल खेलमा झारखण्ड बंगालविरुद्ध १ सय ७३ रनमा अल आउट भयो । झारखण्डका कुमार सुरजले १ सय ७५ बलमा ९ चौकासहित सर्वाधिक ८९ रन बनाए ।

तेस्रो क्वाटरफाइनल खेलमा उत्तरखण्ड कर्नाटाकासँग १ सय १६ रनमा अल आउट भयो । कर्नाटाका पहिलो दिनको खेल सकिँदा १ सय २३ रन बनाउँदा कुनै विकेट गुमाएको छैन । कप्तान मयंक अग्रवाल ६५ र सम्राट आर ५४ रनमा अविजित छन् ।
चौथो क्वाटरफाइनल खेलमा आन्द्र प्रदेशले मध्यप्रदेशविरुद्ध २ विकेट गुमाउँदै २ सय ६२ रन बनाएको छ ।

रिंकी भुई २ सय बलमा १२ चौका र १ छक्कासहित १ सय १५ रनमा अविजित छन् । उनलाई करण सिन्डेले २ सय २२ बलमा ८३ रनमा साथ दिएका छन् । रणजीको सेमिफाइनल खेल ८ फेब्रुअरी र फाइनल १६ फेब्रुअरी देखि सुरु हुनेछ ।