काठमाडौं (हाम्रो खेलकुद) – नेपालले एसियन क्रिकेट काउन्सिल (एसिसी) को एकदिवसीय प्रिमियर कप आयोजना गर्ने भएको छ । पोखरामा जारी नेपाल क्रिकेट संघ (क्यान) को बोर्ड बैठकले पारित गर्दै अप्रिलमा आयोजना गर्ने पक्का भएको छ।

एसिसीले प्रिमियर कप पहिलो पटक गर्न लागेको हो । यसअघि इस्टर्न र वेस्टर्न रिजन हुँदै छनोट गरेपनि यस पटक प्रिमियर कप गर्न लागेको छ । १० टोली सहभागी प्रतियोगिता विजेता टोलीले सेप्टेम्बरमा हुने एसिया कप खेल्न पाउनेछ ।

अप्रिलमा हुने प्रिमियर कपमा समूह ए मा नेपाल, युएई, कुवेत, कतार र छनोटबाट आउने एक टोली हुनेछन् । समूह बी मा ओमान, हङकङ, सिंगापुर, मलेसिया र छनोटबाट आउने एक टोली हुनेछन् । सेमिफाइनल हुँदै फाइनलको विजेताले एसिया कप खेल्न पाउनेछ ।

यस प्रतियोगिता शीर्ष तीन टोलीले इमर्जिङ टिम्स एसिया कप पनि खेल्न पाउनेछन् । एसिया कपमा छनोट हुने एसिया कप टोलीले भारत र पाकिस्तानसँग खेल्नेछ । अर्को समूहमा श्रीलंका, बंगलादेश र अफगानिस्तान छन् । घरेलु टोली नेपाललाई उपाधि जित्दै भारत र पाकिस्तानसँग खेल्ने राम्रो अवसर हुनेछ ।

नेपालले एसिसीको प्रतियोगिता अन्तिम पटक २०१३ मा एसिसी टि२० कप आयोजना गरेको थियो । मार्च अन्तिम देखि अप्रिलसम्म भएको उक्त प्रतियोगिता उपाधि अफगानिस्तानले जितेको थियो । नेपाललाई ७ विकेटले हराउँदै अफगानिस्तानले उक्त उपाधि जितेको थियो ।

त्यसपछि नेपालले ठूला प्रतियोगिता आयोजना गरेको छैन । आइसिसीको प्रतियोगिता रुपमा नेपालले २०१० मा डिभिजन फाइभ आयोजना गर्दै उपाधि जितेको थियो ।

तर आइसिसीको विश्व क्रिकेट लिग च्याम्पियन्ससिप अन्तर्गत केन्या र नामिबियासँग सिरिज खेलेको थियो । आइसिसी विश्वकप लिग–२ का त्रिकोणात्मक सिरिज, त्रिकोणात्मक टि२० आई सिरिज र द्विपक्षीय सिरिज भने लगातार आयोजना गर्दै आएको छ ।