काठमाडौं (हाम्रो खेलकुद) – तीव्र गतिका बलिङ अलराउन्डर गुलशन झाले आइसिसी यू–१९ विश्वकप एसिया क्षेत्र छनोटमा नेपालको कप्तानी गर्ने भएका छन् । पोखरामा बसेको बोर्ड बैठकले गुलशनलाई यू–१९ को कप्तानी जिम्मेवारी दिएको क्यान स्रोतले हाम्रो खेलकुदलाई जानकारी दिएको छ ।
बोर्ड बैठकमा देव खनाल र गुलशनको नाम कप्तानको लागि सिफारिस भएको थियो । बोर्ड बैठकले गुलशनलाई कप्तानको जिम्मेवारी दिएको क्यान स्रोतले हाम्रो खेलकुदलाई जानकारी दिएको छ ।
गुलशनले आफ्नो करिअरमा पहिलो पटक कप्तानी गर्नेछन् । नेपाल पुलिस क्लबबाट घरेलु क्रिकेट खेल्ने गुलशनले तीव्र गतिसँगै तल्लोक्रममा राम्रो ब्याटिङ गर्ने गर्दछन् । गुलशनले सिनियर घरेलु क्रिकेट खेल्न लागेको दुई वर्ष मात्रै भएकोछ ।
दुई वर्षअघि प्रधानमन्त्री कपमा मधेशको टोलीमा नपरेपछि काठमाडौं मेयर्स कपमा नेपाल पुलिस क्लबबाट खेल्दै राम्रो प्रभाव छाडेपछि सिनियर टोली सम्मको यात्रा तय गरेका थिए । ब्याटिङ भने गुलशनले बायाँ हातेले गर्दछन् ।
यू–१९ को कप्तानी दावेदारमा गुलशनसँगै सिनियर टोलीबाट खेलि सकेका देव खनाल र घरेलु क्रिकेटमा राम्रो प्रदर्शन गर्दै आएका दीपक बोहराको नाम चर्चामा थियो ।
१६ वर्षीय गुलशनले नेपालबाट ९ ओडिआई र एक टि२० आई खेल खेलेका छन् । गुलशनले गतवर्ष देव खनालकै कप्तानीमा यू–१९ एसिया कप खेलेका थिए । शीर्षक्रमका ब्याटर देवले नेपालबाट १० ओडिआई खेल खेलि सकेका छन् ।
गतवर्ष लुम्बिनीलाई यू१९ राष्ट्रिय च्याम्पियन बनाएका देव यस पटक भने विशाल विक्रम केसीको कप्तानीमा खेलेका थिए । देवले गतवर्ष नेपालको यू–१९ को कप्तानी गरि सकेका थिए । गुलशन भने सिनियर टोलीमा ब्यस्त हुँदा यस पटक यू-१९ प्रतियोगिता खेलेका थिएनन् ।
नेपालले पहिलो खेल फागुन १२ (फेब्रुअरी २४) मा सिंगापुरसँग खेल्नेछ । दोस्रो खेल फागुन १३ (फेब्रुअरी २५) कुवतेसँग खेल्नेछ । नेपालले त्यसपछि एकदिन विश्राम गर्नेछ । फागुन १५ (फेब्रुअरी२७) मा हङकङसँग खेल्नेछ ।
फागुन १६(फेब्रुअरी २८) मा मलेसियासँग खेल्नेछ । त्यसपछि नेपालले दुई दिन विश्राम गर्नेछ । अन्तिम खेल फागुन १८(मार्च २) मा युएईसँग खेल्नेछ । युएई र नेपाल प्रमुख दाबेदार टोली हुन् ।
नेपाल प्रतियोगिता शीर्ष स्थानमा रहन सके २०२४ मा श्रीलंकामा हुने यू-१९ विश्वकप खेल्न पाउनेछ । नेपाली टोली २०१६ पछि यू-१९ विश्वकप खेल्ने सोचमा हुनेछ । टोलीको मुख्य प्रशिक्षक जगत टमाटा छन् । नेपालले १४ सदस्य टोली पनि घोषणा गरेको छ ।
नेपाली यू–१९ टोली :
आकाश त्रिपाठी, अर्जुन कुमाल, दीपक बोहरा, दीपक बोहरा, उत्तम थापामगर (विकेटकिपर) दीपक डुम्रे (विकेटकिपर), दीपेश कँडेल, हेमन्त धामी, दुर्गेश गुप्ता, गुलशन झा, देव खनाल, सुवास भण्डारी, विशाल विक्रम केसी र मिलन बोहरा ।
