काठमाडौं (हाम्रो खेलकुद) – नेपाल क्रिकेट संघ (क्यान) ले महिला क्रिकेट टोलीको ग्रेड विभाजन (केन्द्रिय सम्झौता) खेलाडी संख्या घटाएको छ । क्यानले २०२३ को जनवरी देखि जुनसम्म ६ महिनाको लागि सम्झौता गरेको छ । पुरुष खेलाडी १८ र महिला १२ खेलाडी सम्झौतामा राख्ने पोखरामा बसेको बोर्ड बैठकले निर्णय गरेको छ।
क्यानले २०२२ मा महिला खेलाडीको सम्झौता १८ गरेको थियो । तर यो पटक १२ खेलाडीमा झारेको छ । महिला खेलाडीको ए ग्रेडमा रहने खेलाडीले २१ हजार, बी ग्रेडमा रहने खेलाडीले १८ हजार र सी ग्रेडमा रहेका खेलाडीले १५ हजार प्राप्त गर्नेछन् ।
क्यानका कार्यवाहक सचिव दुर्गाराज पाठकले निश्चित मापदण्ड नपुगेपछि १२ खेलाडीमा झारिएको बताएका छन् । ‘हामीले एउटा निश्चित मापदण्ड बनाएका छौं । त्यो मेल नखाएपछि हामीले १२ बनाएका हौं । पाउन १८ ले नै पाउने छन् । बाँकीले प्रोत्साहन रुपमा पाउनेछन्’, पाठकले हाम्रो खेलकुदसँग भने ।
‘हामीले एउटा गाइड लाइन बनाएका छौं । यति टि२० आई खेल खेल्नी भन्नेछ । अरुको पुगेको छ । तलमाथि हुनेक्रममा धेरै जना भन्दा बरु प्रोत्साहन स्वरुप देऊ र सबैले पाउँछन् भन्ने छ । प्रदर्शनको आधारका उनीहरुले राम्रो गरेको छ भनेर दिने निर्णय गरेका छौं । सम्झौताको रुपमा नभएर एकमुष्ट रुपमा दिने निर्णय गरेका हौं’, उनले भने ।
पछिल्लो समय सानदार प्रदर्शन गर्दै आएकी कविता कुँवर भने ग्रेड बी मा छिन् । अर्की तीव्र गतिकी बलर अश्मिना कर्माचार्यले ग्रेड बी मा बढुवा भएकी छिन् । उनी गतवर्ष ग्रेड सी मा थिइन् ।
क्यानले ग्रेड ए मा कप्तान रुविना क्षेत्री बेलबासे, उपकप्तान इन्दु बर्मा र सीता रानामगरलाई राखेको छ । ग्रेड बी मा काजोल श्रेष्ठ, कविता कुँवर र अश्मिना कर्माचार्य छिन् । ग्रेड सी मा कविता जोशी, विन्दु रावल, संगिता राई, ममता चौधरी, ज्योति पाण्डे र अप्सरी बेगम छन् ।
