एजेन्सी – भारतीय युवा ओपनर शुभमन गिलले विराट कोहलीको कीर्तिमान तोडेका छन् । तेस्रो तथा अन्तिम टि२० आई खेलमा न्युजिल्यान्डविरुद्ध सानदार शतक हान्दै गिलले कोहलीको कीर्तिमान तोडेका हुन् ।
अहमदाबादमा टस जितेर पहिला ब्याटिङ रोजेको भारतले निर्धारित २० ओभरमा ४ विकेट गुमाउँदै २ सय ३४ रन बनायो । ओपनर शुभमन गिल ६३ बलमा १२ चौका र ७ छक्कासहित १ सय २६ रनमा अविजित रहे ।
गिलको यो टि२० आई करिअरको पहिलो शतक हो । गिल भारतबाट टि२० आईमा एकै इनिङमा सर्वाधिक रन बनाउने ब्याटर पनि बनेका छन् । गिलले उक्त कीर्तिमान विराट कोहलीको तोडेका हुन् । कोहलीले एसिया कप २०२२ को सेप्टेम्बरमा अफगानिस्तानविरुद्ध ६१ बलमा १ सय २२ रनको अविजित शतकीय इनिङ खेलेका थिए । जुन गिल अघि भारतबाट सर्वाधिक टि२० आई उच्च स्कोर थियो ।
२०१७ मा रोहित शर्माले श्रीलंकाविरुद्ध १ सय १८ र सूर्यकुमार यादवले २०२२ मा इंग्ल्यान्डविरुद्ध १ सय १७ रनको शतकीय इनिङ खेलेका थिए । गिल भारतबाट टि२० आईमा सर्वाधिक कम उमेरमा टि२० आईमा शतक हान्ने खेलाडी पनि बनेका छन् । गिलले २३ वर्ष १ सय ४६ दिनमा शतक हानेका छन् । उनले सुरेश रैनाको २३ वर्ष १ सय ५६ दिनमा २०१० मा दक्षिण अफ्रिकाविरुद्ध हानेको शतकको कीर्तिमान तोडेका हुन् ।
जितको लागि २ सय ३५ रनको विशाल विजयी लक्ष्य पछ्याएको न्युजिल्यान्ड १२.१ ओभरमा मात्रै ६६ रनमा अल आउट भएको थियो । न्युजिल्यान्डका डर्याल मिचेलले २५ बलमा १ चौका र ३ छक्कासहित सर्वाधिक ३५ रन बनाएका थिए ।
टि२० आई इतिहासमा यो जित भारतको सर्वाधिक ठूलो अन्तरको हो । यसअघि आयरल्यान्डविरुद्ध १ सय ४३ रनको जित भारतको टि२० आईमा सर्वाधिक ठूलो अन्तरको जित थियो । टेस्ट टोलीले टि२० आईमा हारेको यो सर्वाधिक ठूलो अन्तर हो ।
यसअघि आयरल्यान्डले २०१८ मा भारतसँग तथा वेस्टइन्डिजले पाकिस्तानसँग समान १ सय ४३ रनले पराजित भएका थिए । भारतले टि२० आई इतिहासमा विपक्षीलाई अल आउट गरको सबैभन्दा कम योगफल हो ।
यसअघि आयरल्यान्डलाई २०१८ मा ७० रन र २०१२ मा इंग्ल्यान्डलाई ८० रनमा अल आउट गरेको थियो । न्युजिल्यान्डको यो टि२० आईमा हालसम्मकै फराकिलो हार हो । यसअघि पाकिस्तानसँग २०१० मा १ सय ३ रनको हार नै सर्वाधिक फराकिलो हार रहँदै आएको थियो । तीन खेलको सिरिज भारतले २-१ ले जितेको छ ।
