काठमाडौं (हाम्रो खेलकुद)– नाबालिग बलात्कार आरोपी सन्दीप लामिछानेको मुद्दामा सर्वोच्च अदालतले कैफियत प्रतिवेदन झिकाउन आदेश दिएको छ ।

न्यायाधिक हरिप्रसाद फुयालको एकल इजलासले शुक्रबार काठमाडौं जिल्ला अदालतमा सन्दीपविरुद्ध दर्ता मुद्दासहित उनलाई धरौटीमा रिहा गर्ने उच्च अदालतको आदेशसहितका कागजात झिकाउनमा आदेश दिएको हो । पाटन उच्च अदालते सन्दीपलाई पुस २८ गते २० लाख रुपैयाँ धरौटीमा रिहा गर्न आदेश दिएको थियो ।

जबरजस्ती करणी मुद्दामा ९९ दिन केन्द्रीय कारागार सुन्धारामा बसेर सन्दीप पुस २९ गते रिहा भएका थिए । उच्च अदालतको आदेशको बदर गर्न मागसहित महान्यायाधिवक्ताको कार्यालयले सर्वोच्चमा निवेदन दिएको थियो । सोही निवेदनको सुनुवाईका क्रममा फुयालको एजलासले कागजात झिाउनका आदेश दिएका हुन् । महान्यायाधिवक्ताको कार्यालयले धरौटीमा रिहा गर्ने पाटन उच्च अदालतको आदेश बदर गर्न माग गरेको छ।

रिहा भएका सन्दीपलाई नेपाल क्रिकेट संघ (क्यान) को माघ १७ पोखरामा बसेको बैठकले निलम्बन फुकुवा गरेको थियो । त्यसकै आधारमा छनोट समितिले उनलाई राष्ट्रिय टोलीको प्रशिक्षणमा सामेल गरेका छन् । शुक्रबार उनी प्रशिक्षणका लागि टोलीसँग कीर्तिपुरस्थित त्रिवि मैदानमा पुगेका छन् ।