एजेन्सी – वेस्टइन्डिजका महान् क्रिकेटर शिवनारायण चन्द्रपाउलका छोरा तेजनारायणले जिम्बावेसँगको पहिलो टेस्ट खेलमा सानदार दोहोरो शतक प्रहार गरेका छन् ।

क्विन्स स्पोर्ट्स क्लबमा टस जितेर पहिला ब्याटिङ रोजेको वेस्टइन्डिजले पहिलो इनिङमा १४३ ओभर ब्याटिङ गर्दै ४४७–६ को अवस्थामा इनिङ समाप्तिको घोषणा गर्यो ।

२६ वर्षीय तेजनारायणले ४ सय ६७ बलमा १६ चौका र ३ छक्कासहित २ सय ७ रनको अविजित दोहोरो शतकीय इनिङ खेले । २६ वर्षीय उनले आफ्नोा करिअरको मात्रै तेस्रो टेस्ट खेलमा दोहोरो शतक हानेका हुन् ।

कप्तान क्रेग ब्रेथवेट ३ सय १२ बलमा १८ चौकासहित १ सय ८२ रनमा आउट भए । पहिलो विकेटका लागि तेजनारायण र ब्रेथवेटले ३ सय ३६ रनको सानदार तेहेरो शतकीय साझेदारी गरेका थिए । यो वेस्टइन्डिजबाट टेस्ट क्रिकेटमा पहिलो विकेटका लागि भएको उच्च साझेदारी हो ।

समग्रमा वेस्टइन्डिजको टेस्टमा पाँचौं ठूलो साझेदारी हो । अन्य ब्याटरको प्रदर्शन भने राम्रो हुन सकेन । जिम्बावेका ब्रेन्डन मभुताले सर्वाधिक पाँच विकेट लिए ।

तेजरायणले गत नोभेम्बरमा अष्ट्रेलियाविरुद्ध डेब्यू गरेका थिए । उनले पाँच इनिङमा ९१.७५ को औसतमा ३ सय ६७ रन बनाई सकेका छन् । उनलाई वेस्टइन्डिजको आगमी ब्याटिङको भविष्यको रुपमा हेरिएको छ ।

उनका बुबा शिवनारायणले १ सय ६४ टेस्ट खेलमा ३० शतकसहित ११ हजार ८ सय ६७ रन बनाएका छन् । २ सय ६८ ओडिआई खेलमा ११ शतक र ५९ अर्धशतकसहित कुल ८ हजार ७ सय ७८ रन बनाएका छन् । विश्व क्रिकेटकै एक सर्वाधिक सफल ब्याटर शिवनारायण पछिल्लो समय अमेरिका यू१९ महिला टोलीको मुख्य प्रशिक्षकको रुपमा काम गर्दै आएका छन् ।