एजेन्सी– भारतीय ओपनर मयंक अग्रवालले रणजी ट्रफीको दोस्रो सेमिफाइनल खेलमा कर्नाटकाबाट सौराष्ट्रविरुद्ध दोहोरो शतक प्रहार गरेका छन् । चिन्नास्वामी स्टेडियममा टस हारेर पहिला ब्याटिङको निम्तो पाएको कर्नाटका दोस्रो दिन पहिलो सेसनमा ४ सय ७ रनमा अल आउट भएको छ ।

कर्नाटका कप्तान तथा ओपनर मयंक अग्रवालले ४ सय २९ बलमा २८ चौका र ५ छक्कासहित २ सय ४९ रनको दोहोरो शतकीय इनिङ खेले । अग्रवाल रन आउट हुन पुगेका थिए । अग्रवालले दोहोरो शतक प्रहार गर्न तल्लोक्रमका ब्याटरसँग राम्रो साझेदारी गरे ।

अग्रवाल र श्रीधरन शरथले छैटौं विकेटका लागि ३ सय ११ बलमा १ सय ३९ रनको साझेदारी गरेका थिए । अग्रवालले नवौं विकेटका लागि विद्धत कावेरप्पासँग ९१ रनको साझेदारी गरेका थिए । उक्त साझेदारीमा अग्रवालले ७३ र विद्धतले १५ रन जोडेका थिए । सौराष्ट्रका चेतन सकारिया र केडी पटेलले तीन तीन विकेट लिए ।

भारतीय ओपनर अग्रवाल २०२२ मार्चमा श्रीलंकाविरुद्ध खेलपछि टोलीमा छैनन् । अग्रवालले भारतबाट २१ टेस्ट र पाँच ओडिआई खेल खेलेका छन् । रणजी ट्रफीमा सानदार प्रदर्शनपछि भारतीय टोलीमा पूनरागमनको सम्भावना बढेका छ ।

जनवरी तेस्रो साता अग्रवालले केरलाविरुद्ध २ सय ८ रनको दोहोरो शतक प्रहार गरेका थिए । अग्रवालले रणजी ट्रफीमा सानदार प्रदर्शन गर्नेक्रममा यस सिजनमा ९ सय ३५ रन बनाउँदै सर्वाधिक रन बनाउने ब्याटरको सूचिमा शीर्ष स्थानमा छन् ।