काठमाडौं (हाम्रो खेलकुद)– मध्यक्रमका ब्याटर आरिफ शेख आइसिसी विश्वकप लिग–२ त्रिकोणात्मक ओडिआई सिरिज अन्तर्गत नामिबिया र स्कटल्यान्डविरुद्ध खेल्ने टोलीमा छैनन् । घरेलु टोली नेपालले अन्तिम १४ सदस्य टोली घोषणा गर्दा आरिफलाई भने वैकल्पिक सूचिमा राखेको छ ।

नेपाली क्रिकेट टोलीका प्रमुख छनोटकर्ता दीपेन्द्र चौधरीले आरिफ टोलीमा नपर्नुको कारण बताएका छन् । दीपेन्द्र चौधरीका अनुसार आरिफ स्वास्थ्य अवस्थाको कारण टोलीमा नपरेका हुन् ।

‘आरिफलाई इन्फेक्सन ज्वरो देखिएको छ । त्यसैले उसलाई रिकभरीको लागि समय दिएको छ । सबै रिपोर्ट मैले पढेको छैन । ज्वरोसँगै खोकी र दुखाई पनि रहेको छ । औषधी खाई रहेका छन् । ठिक नहुँदा टोलीमा नभएका हुन्’, दीपेन्द्रले हाम्रो खेलकुदसँग भने ।

आरिफ नेपालका ओडिआई क्रिकेटका भरपर्दा ब्याटर हुन् । आरिफले तल्लोक्रममा लगातार राम्रो प्रदर्शन गर्दै आएका छन् । आरिफले ३२ ओडिआई खेलमा ४ अर्धशतकसहित ५ सय ८२ रन जोडेका छन् । आरिफ मध्य गतिका बलिङ विकल्प समेत हुन् । आरिफ फिट नहुँदा नेपालले भीम सार्कीलाई मौका दिएको छ ।

भीम लगातार उत्कृष्ट प्रदर्शन गर्दै आएपनि मौका पाउन सकेका छैनन् । आरिफको स्थानमा भीमसँगै कुशल मल्ल र सन्दीप जोरा मध्य एकले मौका पाउनेछन् ।

आरिफ नहुँदा टोलीको रणनीतिमा केहि असर भने पर्नसक्छ । नेपालले सन्दीप लामिछानेलाई पनि मौका दिएको छ । दीपेन्द्रले सन्दीपको फिटनेश अवस्था ठिक भएको बताए । त्यस्तै बायाँ हाते स्पिनर सूर्य तामाङ पहिलो पटक टोलीमा परेका छन् ।
नेपालले आरिफसँगै अर्जुन साउद, प्रतिश जि.सी र मौसम ढकाललाई बेन्चमा राखेकोछ । किशोर महतो र कमलसिंह ऐरी भने अन्तिम २० बाट बाहिरिएका छन् ।

नेपालले घरेलु मैदान टियुमा पहिलो खेल फागुन २ (फेब्रुअरी १४) मा नामिबियासँग खेल्नेछ । दोस्रो खेल फागुन ५ (फेब्रुअरी १७) मा स्कटल्यान्डसँग खेल्नेछ । नेपालले फागुन ६ (फेब्रुअरी १८) मा नामिबियासँग खेल्नेछ । नेपालले यस सिरिजको अन्तिम खेल फागुन ९(फेब्रअरी २१) मा स्कटल्यान्डसँग खेल्नेछ ।

नेपालको टोली :

रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी, सन्दीप लामिछाने, गुलशन झा, भीम सार्की र सूर्य तामाङ ।

वैकल्पिक खेलाडी :
आरिफ शेख, प्रतिश जि.सी. मौसम ढकाल र अर्जुन साउद ।