एजेन्सी – अष्ट्रेलियाका युवा स्पिनर टोड मर्फीले डेब्यू खेलमै घरेलु टोली भारतविरुद्ध ७ विकेट लिएका छन् । तर कप्तान रोहित शर्माको शतक, अक्षर पटेल र रविन्द्र जडेजाले तल्लोक्रममा उत्कृष्ट ब्याटिङ गरेपछि भारतले पहिलो इनिङमा २ सय २३ रनको विशाल अग्रता लिएको छ ।

तेस्रो दिन पहिलो सेसनमा भारत पहिलो इनिङमा ४ सय रनमा अल आउट भएको छ । अन्तिम विकेटको रुपमा बोल्ड भएका अक्षर पटेल १ सय ७४ बलमा १० चौका र १ छक्कासहित ८४ रनमा आउट भए । पटेलको यो अन्तर्राष्ट्रिय कुनैपनि क्रिकेटमा उच्च प्रदर्शन हो । कप्तान प्याट कमिन्सले उनलाई बोल्ड आउट गरेका थिए ।

तेस्रो दिन सुरुवातमा रविन्द्र जडेजा १ सय ८५ बलमा ९ चौकासहित ७० रनमा मर्फीको बलमा बोल्ड आउट भए । आठौं विकेटका लागि जडेजा र पटेलले २ सय ११ बलमा ८८ रनको साझेदारी गर्दै अग्रता विशाल बनाएका थिए । नवौं विकेटका लागि पटेल र मोहम्मद शामीले ८६ बलमा ५२ रनको साझेदारी गर्दै अग्रता झनै बढाएका थिए । शामी ४७ बलमा २ चौका र ३ छक्कासहित ३७ रनमा आउट भए ।

दोस्रो दिन कप्तान रोहित शर्मा २ सय १२ बलमा १५ चौका र २ छक्कासहित १ सय २० रनको शतकीय इनिङ खेल्दै आउट भएका थिए । रोहितको यो टेस्ट करिअरको नवौं शतक हो ।

मुर्फीले रविचन्द्रन आश्विनलाई २३ रनमा एलबीडब्लू आउट गरेका थिए । विराट कोहली १२ र चेतेश्वर पुजारालाई मुर्फीले ७ रनमा क्याच गराउँदै अष्ट्रेलियालाई राम्रो सुरुवात दिलाएका थिए ।

डेब्यू खेल खेलेका सूर्यकुमार यादव ८ रनमा नाथन लायनको बलमा बोल्ड भए । केएस भरत मुर्फीकै बलमा ८ रनमा आउट भए । अष्ट्रेलिया स्पिनर टोड मर्फीले ४७ ओभरमा १२ मेडन राख्दै १ सय २४ रन खर्चेर ७ विकेट लिए । कप्तान प्याट कमिन्सले दुई र नाथन लायनले एक विकेट लिए ।

त्यसअघि नागपुरमा टस जितेर पहिला ब्याटिङ थालेको अष्ट्रेलिया पहिलो दिननै ६३.५ ओभरमा १ सय ७७ रनमा अल आउट भएको थियो । अष्ट्रेलियाका शीर्षक्रमका ब्याटर मार्नस लाबुसेनले १ सय २३ बलमा ८ चौकासहित सर्वाधिक ४९ रन बनाएका थिए । प्रमुख ब्याटर स्टिभ स्मिथ १ सय ७ बलमा ७ चौकासहित ३७ रनमा आउट भएका थिए ।

तेस्रो विकेटका लागि मार्नस लाबुसेन र स्टिभ स्मिथले ८२ रनको साझेदारी गर्दै खेल पूनरागमन गराएका थिए । तर भोजनपछि दोस्रो सेसनमा अष्ट्रेलियाले सुरुवातमै स्मिथ र लाबुसेनलाई गुमायो । त्यसपछि भने अष्ट्रेलिया ब्याटर क्रिजमा धेरै समय टिक्न सकेनन् ।

रविन्द्र जडेजाको बलमा लाबुसेन विकेटकिपर केएस भरतबाट स्टम्पिङ आउट भए । जडेजाले स्मिथलाई बोल्ड गरे । लगत्तै म्याट रेनेशलाई शून्यमा एलबीडब्लू आउट गरे । पिटर ह्यान्ड्सकम्ब ८४ बलमा ४ चौकासहित ३१ रनमा आउट भए । एलेक्स केरी ३३ बलमा ७ चौकासहित ३६ रनमा आउट भए ।

भारतका रविन्द्र जडेजाले २२ ओभरमा ८ मेडनराख्दै ४७ रन खर्चेर ५ विकेट लिए । रविचन्द्रन आश्विनले तीन, मोहम्मद शामी र मोहम्मदी शिराजले एक एक विकेट लिए । भारत र अष्ट्रेलियाबीच चार टेस्ट खेलको सिरिजको हुनेछ । भारतलाई आइसिसी विश्व टेस्ट च्याम्पियनसिप २०२३ को फाइनल खेल्न कम्तिमा तीन खेल जित्नुपर्ने हुन्छ ।

अष्ट्रेलियाको फाइनल यात्रा अनौपचारिक रुपमा मात्रै बाँकी छ । यदि भारतले तीन खेल जित्न नसकेको खण्डमा श्रीलंका र दक्षिण अफ्रिका मध्य एक टोली फाइनलमा पुग्ने समिकरण छ ।