एजेन्सी – स्पिनर सामु निरिह बनेपछि अष्ट्रेलियाले पहिलो टेस्ट खेलमा घरेलु टोली भारतसँग १ सय ३२ रनको इनिङ अन्तरको लज्जास्पद हार व्येहोरको छ । यो जितसँगै चार टेस्ट खेलको सिरिजमा भारतले १–० को अग्रता पनि लिएको छ ।

तेस्रो दिन दोस्रो सेसनमा अष्ट्रेलिया दोस्रो इनिङमा मात्रै ९१ रनमा अल आउट भयो । पहिलो इनिङमा २ सय २३ रनले पछि परेको अष्ट्रेलिया इनिङ अन्तरले पराजित हुन पुगेको हो । अष्ट्रेलियाका स्टिभ स्मिथले ५१ बलमा २ चौका र १ छक्कासहित सर्वाधिक २५ रनमा अविजित रहे । अन्य कुनैपनि अष्ट्रेलिया ब्याटरले राम्रो प्रदर्शन गर्न सकेनन् ।

अष्ट्रेलियाका ओपनर उस्मान खवाजा ५, डेविड वार्नर १०, मार्नस लाबुसेन २८ बलमा ३ चौकासहित १७, म्याट रेनेश २, एलेक्स केरी १० र प्याट कमिन्स १ रनमा आउट भए । भारतका स्पिनर रविचन्द्रन आश्विनले सर्वाधिक पाँच विकेट लिए । रविन्द्र जडेजा र मोहम्मद शामीले दुई दुई विकेट लिए । अक्षर पटेलको नाममा १ विकेट रह्यो ।

त्यसअघि तेस्रो दिन पहिलो सेसनमा भारत पहिलो इनिङमा ४ सय रनमा अल आउट भएको थियो । भारतका कप्तान रोहित शर्मा २ सय १२ बलमा १५ चौका र २ छक्कासहित १ सय २० रनको शतकीय इनिङ खेल्दै आउट भएका थिए । रोहितको यो टेस्ट करिअरको नवौं शतक हो ।

अक्षर पटेल १ सय ७४ बलमा १० चौका र १ छक्कासहित ८४ रनमा आउट भए । पटेलको यो अन्तर्राष्ट्रिय कुनैपनि क्रिकेटमा उच्च प्रदर्शन हो । कप्तान प्याट कमिन्सले उनलाई अन्तिम विकेटको रुपमा बोल्ड गरेका थिए । तेस्रो दिन सुरुवातमा रविन्द्र जडेजा १ सय ८५ बलमा ९ चौकासहित ७० रनमा मर्फीको बलमा बोल्ड आउट हुन पुगे ।

आठौं विकेटका लागि जडेजा र पटेलले २ सय ११ बलमा ८८ रनको साझेदारी गर्दै अग्रता विशाल बनाएका थिए । नवौं विकेटका लागि पटेल र मोहम्मद शामीले ८६ बलमा ५२ रनको साझेदारी गर्दै अग्रता झनै बढाएका थिए । शामी ४७ बलमा २ चौका र ३ छक्कासहित ३७ रनमा आउट भए ।

मुर्फीले रविचन्द्रन आश्विनलाई २३ रनमा एलबीडब्लू आउट गरेका थिए । विराट कोहली १२ र चेतेश्वर पुजारालाई मुर्फीले ७ रनमा क्याच गराउँदै अष्ट्रेलियालाई राम्रो सुरुवात दिलाएका थिए । डेब्यू खेल खेलेका सूर्यकुमार यादव ८ रनमा नाथन लायनको बलमा बोल्ड भए । केएस भरत मुर्फीकै बलमा ८ रनमा आउट भए ।

अष्ट्रेलिया स्पिनर टोड मर्फीले ४७ ओभरमा १२ मेडन राख्दै १ सय २४ रन खर्चेर ७ विकेट लिए । कप्तान प्याट कमिन्सले दुई र नाथन लायनले एक विकेट लिए ।

त्यसअघि नागपुरमा टस जितेर पहिला ब्याटिङ थालेको अष्ट्रेलिया पहिलो दिननै ६३.५ ओभरमा १ सय ७७ रनमा अल आउट भएको थियो । अष्ट्रेलियाका शीर्षक्रमका ब्याटर मार्नस लाबुसेनले १ सय २३ बलमा ८ चौकासहित सर्वाधिक ४९ रन बनाएका थिए । प्रमुख ब्याटर स्टिभ स्मिथ १ सय ७ बलमा ७ चौकासहित ३७ रनमा आउट भएका थिए ।

तेस्रो विकेटका लागि मार्नस लाबुसेन र स्टिभ स्मिथले ८२ रनको साझेदारी गर्दै खेल पूनरागमन गराएका थिए । तर भोजनपछि दोस्रो सेसनमा अष्ट्रेलियाले सुरुवातमै स्मिथ र लाबुसेनलाई गुमायो । त्यसपछि भने अष्ट्रेलिया ब्याटर क्रिजमा धेरै समय टिक्न सकेनन् । पिटर ह्यान्ड्सकम्ब ८४ बलमा ४ चौकासहित ३१ रनमा आउट भए । एलेक्स केरी ३३ बलमा ७ चौकासहित ३६ रनमा आउट भए ।

भारतका रविन्द्र जडेजाले सर्वाधिक पाँच विकेट लिए । रविचन्द्रन आश्विनले तीन, मोहम्मद शामी र मोहम्मदी शिराजले एक एक विकेट लिए । पहिलो इनिङमा ८ र दोस्रो इनिङमा ७ गरि भारतीय स्पिनरले मात्रै १५ विकेट लिएका थिए । बाँकी पाँच विकेट तीव्र गतिका बलरको नाममा रह्यो । समग्र ३० मध्य २२ विकेट स्पिनरको नाममा रह्यो । स्पिनर सहयोगी पिचमा अष्ट्रेलिया ब्याटर खुल्न सकेनन् । भारतले आफ्नो घरेलु मैदान र कन्डिसनको भरपूर्ण फाइदा उठायो ।

भारत र अष्ट्रेलियाबीच चार टेस्ट खेलको सिरिजको हुनेछ । भारतलाई आइसिसी विश्व टेस्ट च्याम्पियनसिप २०२३ को फाइनल खेल्न कम्तिमा तीन खेल जित्नुपर्ने हुन्छ ।अष्ट्रेलियाको फाइनल यात्रा अनौपचारिक रुपमा मात्रै बाँकी छ ।

यदि भारतले तीन खेल जित्न नसकेको खण्डमा श्रीलंका र दक्षिण अफ्रिका मध्य एक टोली फाइनलमा पुग्ने समिकरण छ । भारत र अष्ट्रेलियाबीच दोस्रो खेल १७ फेब्रुअरी देखि दिल्लीमा सुरुहुनेछ ।