सातौं राष्ट्रिय खेलकुद
विराटनगर (हाम्रो खेलकुद) – एपिएफ सातौं राष्ट्रिय खेलकुदको क्रिकेटमा पनि च्याम्पियन बनेको छ । फुटबलमा जस्तै अर्को विभागिय टोली त्रिभुवन आर्मी क्लबलाई ४९ रनले हराउँदै एपिएफले स्वर्ण पदक जितेको हो । धरानमा शुक्रबार नै आर्मीलाई २–० ले हराएर एपिएफले फुटबलमा पनि स्वर्ण पदक जितेको थियो ।
मोरङको बैझनाथपुर रंगशालामा टस हारेर पनि पहिले ब्याटिङको निम्ता पाएको एपिएफले निर्धारित २० ओभरमा १ सय २१ रनको योगफल तयार पारेको थियो । टोलकिा कप्तान पारस खड्काले ३८ बलको सामना गर्दै ३३ रन जोडे । १ सय २२ रनको मध्यम लक्ष्य पछ्याएको आमीृको टोली ७२ रनमा अलआउट भयो र रजत पदकमा चित्त बुझाउन बाध्य भयो । एएिफका भुवन कार्कीले ४ विकेट लिए ।
फुटबलमा जस्तै क्रिकेटमा पनि अर्को विभागिय टोली नेपाल पुलिसले कांस्य पदक जितेको छ । मध्यमाञ्चललाई ३३ रनले हराउँदै पुलिस तेस्रो भएको थियो । टस जितेर पहिले ब्याटिङ गरेको पुलिसले निर्धारित २० ओभरमा ७ विकेटको क्षेतिमा १ सय ५५ रन बनाएको थियो । पुलिसका मञ्जित श्रेष्ठले १५ बलको सामना गर्दै ३६ रन बनाएका थिए । जवाफमा मध्यमाञ्चलले २० ओभरमा ८ विकेट गुमाएर १ सय २२ रनमात्र बनाउन सक्यो ।
