काठमाडौं (हाम्रो खेलकुद) – नामिबियाले सात वर्षपछि नेपालसँग मंगलबार टियु क्रिकेट मैदानमा प्रतिस्पर्धा गर्दैछ । आइसिसी विश्वकप लिग–२ त्रिकोणात्मक ओडिआई सिरिजको लागि नामिबिया ७ वर्षपछि नेपाल आएको हो।

नामिबियाले पछिल्लो पटक २०१६ मा नेपालमा आएर खेलेको थियो । त्यसपछि नेपाली भूमिका नामिबियाको पहिलो खेल हुनेछ । आइसिसी विश्व क्रिकेट लिग च्याम्पियनसिप २०१५–१७ अन्तर्गत नामिबिया नेपाल आएको थियो । २०१६ अप्रिल १६ मा टियु मैदानमा नेपाल र नामिबियाबीच पहिलो खेल भएको थियो । टियु क्रिकेट मैदानमा टस जितेर पहिला ब्याटिङ थालेको नामिबियाले ९ विकेट गुमाउँदै ५० ओभरमा १ सय ९५ रन बनाएको थियो ।

उक्त विजयी लक्ष्य पछ्याएको नेपालले ४७.१ ओभरमा ५ विकेट गुमाउँदै पूरा गरेको थियो । नेपालको जितमा शरद भेषावकरले ९९ बलमा ३ चौकासहित ५० रनको अविजित इनिङ खेलेका थिए । दोस्रो खेलमा नेपालले नामिबियालाई तीन विकेटले हराएको थियो । टियु क्रिकेट मैदानमा टस हारेर पहिला ब्याटिङ थालेको नामिबियाले निर्धारित ५० ओभरमा ९ विकेट गुमाउँदै २ सय ३९ रन बनाएको थियो ।

जितको लागि २ सय ४० रनको विजयी लक्ष्य पछ्याएको नेपालले ४९.५ ओभरमा ७ विकेट गुमाउँदै पूरा गरेको थियो । तत्कालिन कप्तान पारस खड्काले ९४ बलमा ५ चौका र ७ छक्कासहित १ सय ३ रनको सानदार शतकीय इनिङ खेलेका थिए । त्यो समय नेपाल आएका जेरार्ड इरास्मस अहिले नामिबियाका कप्तान् बनेका छन्। जेरार्डसँगै, विकेटकिपर जेन ग्रिन र लोहान लोउरेन्स गरि तीन खेलाडी यस पटक टोलीमा पनि छन् ।

२०१८ मा डिभिजन २ मा नेपालले घरेलु टोली नामिबियामाथि एक विकेटको रोमान्चक जित हात पारेको थियो । लिग–२ मा भने नेपालले नामिबियालाई हराउन सकेको छैन । नेपाल र नामिबियाबीच ओडिआईमा चार खेल भएका छन् । चार मध्य तीन खेलमा नेपाल पराजित हुँदा एक खेलमा वर्षाको कारण अंक बाँडेको थियो ।

गत जुलाईमा स्कटल्यान्डमा नामिबियाले दुबै खेलमा ४० रन र ६३ रनले हराएको थियो । जसक्रममा दोस्रो खेलमा २ सय रनको विजयी लक्ष्य पछ्याउनेक्रममा नेपाल १ सय ३६ रनमा अल आउट भएको थियो । गत डिसेम्बरमा पहिलो खेलमा घरेलु टोली नामिबियाविरुद्ध नेपाल ४९.५ ओभरमा १ सय ९७ रनमा अल आउट भएको थियो ।

त्यसपछि ४ बलमा ४ रन बनाउँदा वर्षाको कारण खेल हुन सकेको थिएन । दोस्रो खेलमा नामिबियाले नेपाललाई २ सय ७६ रनको लक्ष्य दिएको थियो । उक्त विजयी लक्ष्य पछ्याएको नेपाल १ सय ८९ रनमा अल आउट भएको थियो ।

नामिबियाका प्रमुख दुई अलराउन्डर नेपाल भ्रमणमा छैनन् । जेजे स्मित र डेविड विजा नेपाल आएका छैनन् । यी दुई प्रमुख अलराउन्डर नहुँदा नामिबिया केहि कमजोर बन्ने देखिन्छ । नेपाल र नामिबियाबीचको खेल बिहान ९ बजे टियु क्रिकेट मैदानमा सुरु हुनेछ । खेलको टिकट मूल्य १ सय ५० र ३ सय ५० रुपैयाँ रहेको छ ।

नामिबिया ३० खेलमा १८ मा जित र ११ मा हारसहित ३७ अंक जोड्दै तेस्रो स्थानमा छ । नेपाल २४ खेलमा ८ मा जित र १४ मा हारसहित १८ अंकका साथ छैटौं स्थानमा छ ।

नामिबियाको टोली :

जेरार्ड इरास्मस (कप्तान), लोहान लरेन्स, टांगेनी लुमामेनी, जेन ग्रिन, माइकल भान लिगेन, जान फ्रिलिंक, बेनार्ड शोल्ट्स, हेलाओ या फ्रान्स, बेन सिकांगो, कार्ल विक्रेनस्टोक, जोशुआन जुलिउस, निकोल लोफ्टी इआटोन, रुबेन ट्रम्पलम्यान र शन फुसे ।

नेपालको टोली :

रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी, सन्दीप लामिछाने, गुलशन झा, भीम सार्की र सूर्य तामाङ ।