काठमाडौं (हाम्रो खेलकुद) – नेपाली क्रिकेट टोलीका ब्याटर कुशल भुर्तेलले आफूलाई ओपनिङ गर्ननै सहज लाग्ने बताएका छन् । आइसिसी विश्वकप लिग-२ त्रिकोणात्मक ओडिआई सिरिजमा मंगलबार नामिबियाविरुद्ध कीर्तिमानी शतक हानेपछि कुशलले उक्त प्रतिक्रिया दिएका हुन् ।

कुशलको शतकको सहयोगमा २ सय ८६ रनको विजयी लक्ष्य पछ्याएको नेपालले ४७.४ ओभरमा ८ विकेट गुमाउँदै पूरा गर्यो । कुशलले १ सय १३ बलमा १० चौका र ४ छक्कासहित १ सय १५ रनको सानदार शतकीय इनिङ खेले । कुशलको यो ओडिआई करिअरको पहिलो शतक हो । नेपालबाट ओडिआईमा शतक हान्ने चौथो र ओपनरको रुपमा पहिलो ब्याटर हुन् ।

नेपालले पूरा गरेको यो सर्वाधिक ठूलो योगफल हो । यसअघि ओडिआईमा पूरा गरेको सर्वाधिक उच्च योगफल २०१९ मा युएईविरुद्ध तेस्रो खेलमा २ सय ५५ रनको विजयी लक्ष्य ४४.४ ओभरमा ६ विकेट गुमाउँदै पूरा गरेको थियो ।

‘ओडिआईमा पहिलो शतक हान्दा खुशी नै छु । समग्रमा टिमले राम्रो लक्ष्य पूरा गरेको छ । अन्तिम १२ खेलमा हामीले के के गर्ने जुन सोचेका थियौं त्यो आज पूरा भएको छ । आफ्नो भन्दापनि टिमले राम्रो गर्दा खुशी छु’, जितपछि कुशलले भने ।

कुशल भुर्तेललाई नेपालले गत भदौंमा केन्या भ्रमणको समयमा टोलीबाट बाहिर राखेको थियो । त्यसपछि नेपाली टोलीमा पूनरागमन गर्दै कुशलले युएईसँगको तीन ओडिआई खेलको सिरिजमा गत नोभेम्बरमा तल्लोक्रममा खेल्नु परेको थियो ।

तत्कालिन प्रशिक्षक मनोज प्रभाकरले कुशललाई तल्लोक्रममा खेलाएका थिए । जुन निर्णय चौतर्फी आलोचना भएको थियो । नामिबिया भ्रमणमा पनि नेपालले कुशललाई तल्लोक्रममा नै खेलाएको थियो । जसको कारण ब्याटिङ भद्रगोलसँगै नेपालले खराब प्रदर्शन गरेको थियो ।

तर पछिल्लो दुई वर्षदेखि ओपनिङ गर्दै आएका कुशलले फिनिसर भूमिकामा राम्रो गर्न सकेका थिएनन् । ओपनिङमा भने सानदार प्रदर्शन गर्दै कीर्तिमानै बनाए । कुलशले २०२१ मा टियु मैदानमा नेदरल्यान्ड्सँग टि२० आईमा डेब्यू गरेका थिए ।

मलेसिया र नेदरल्यान्ड्ससँगको त्रिकोणात्मक ओडिआई सिरिजमा डेब्यूको सुरुवाती तीन खेलमा लगातार अर्धशतक प्रहार गर्दै विश्व कीर्तिमान बनाएका थिए । कुशल डेब्यूको सुरुवाती तीन खेलमा लगातार अर्धशतक हान्ने विश्वकै पहिलो खेलाडी हुन् । नेपालबाट ओडिआईमा ओपनरको रुपमा शतक हान्ने पहिलो खेलाडी बने । कुशल ओपनर भूमिकामा आत्माविश्वास मिलेको बताउँछन् ।

‘अगाडि देखिनै मैले ओपनिङ गर्छु भन्ने थाहा थियो । प्रशिक्षकले एउटा भूमिका दिनु भएको थियो । मलाई ओपनिङ गर्न नै सजिलो लाग्छ । ओपनिङ खेलेर नै स्कोर गर्दा खुशीनै लाग्छ’, उनले भने । नेपालले जितको लागि २ सय ८६ रन बनाउनु पर्ने हुन्छ । यसअघिको ब्याटिङ हेर्दा सुरुवातमा कठिन देखिएको थियो । तर कुशल र रोहित मिलेर जित पक्का गराए । प्रशिक्षकले योजना दिए अनुसार खेलेको बताउँछन् ।

‘यस्तो थियो, प्रशिक्षकले योजना दिनु भएको थियो । टियुमा दोस्रो इनिङमा ब्याटिङ गर्न सहज हुन्छ भन्ने थाहा थियो । एक दुईवटा राम्रो साझेदारीले खेल राम्रो हुन्छ भन्ने थाहा थियो । रोहित र मेरो साझेदारीले खेल लग्यो’, कुशलले भने ।

मुख्य प्रशिक्षकको रुपमा मोन्टी देशाई आएको तीन हप्ता भएको छ । मोन्टीको आगमनसँगै नेपाली टोलीको मनोबल फेरिएको छ ।

‘सबै खेलाडी सकरात्मक देखिन्छन् । टिममा सबै सकरात्मक छन् । एक अर्कालाई साथ दिएका छन् । सन्दीपपनि धेरै पछि आयो । उसलाई पनि साथ दिएको छ । प्रशिक्षकले नकरात्मक कुरा गर्दैगर्नुहुन्न । खेल जितेपनि हारेपनि सबैलाई साथ दिनुभएको छ । त्यहिँ हो’, प्रशिक्षक बारे कुशलले भने ।

‘त्यस्तो मैले धेरै सोचेको थिएन । मेरो हातमा कडा मिहिनेत छ भने त्यो देखिन्छ भन्ने थियो । टिममा तलमाथि हुनु कहिले काहिँ आउँछ । मैले आफ्नो काम सोचेको थिए’, उनले भने ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको नामिबियाले निर्धारित ५० ओभरमा २ सय ८५ रनमा अल आउट भएको थियो । नामिबियाका माइकल भान लिंगेनले १ सय ३७ बलमा ९ चौका र ५ छक्कासहित सर्वाधिक १ सय ३३ रनको कीर्तिमानी इनिङ खेलेपनि टोलीको हार भने टार्न सकेनन् ।

उनको यो करिअर र नेपालविरुद्ध लगातार दोस्रो शतक थियो । करण केसीले १० ओभरमा १ मेडन खर्चेर ६१ रन खर्चेर ५ विकेट लिए । सन्दीप लामिछानेले १० ओभरमा ६६ रन खर्चेर ३ विकेट लिए । नेपालले अव दोस्रो खेल शुक्रबार स्कटल्यान्डसँग खेल्नेछ । शनिबार नामिबिया र मंगलबार स्कटल्यान्डसँग खेल्नेछ ।