एजेन्सी – इंग्ल्यान्डले पहिलो टेस्ट खेलमा घरेलु टोली न्युजिल्यान्डविरुद्ध सानदार ब्याटिङ गरेको छ । विश्व क्रिकेटमै फरक रुपमा प्रस्तुत हुँदै टेस्ट क्रिकेटमा आक्रामक ब्याटिङ गर्दै आएको इंग्ल्यान्डले पहिलो दिननै २ सय ८८ रनको अग्रता लिएको छ ।

टस हारेर पहिला ब्याटिङ थालेको इंग्ल्यान्डले पहिलो दिन मात्रै ५८.२ ओभरमा ३२५-९ को अवस्थामा इनिङ समाप्तिको घोषणा गर्यो । इंग्ल्यान्डका ह्यारी ब्रुकले ८१ बलमा १५ चौका र १ छक्कासहित सर्वाधिक ८९ रन बनाए । ओपनर बेन डकेट ६८ बलमा १४ चौकासहित ८४ रनमा आउट भए ।

ओपनर ज्याक क्रली टिम साउथीको बलमा ४ रनमै आउट भएका थिए । दोस्रो विकेटका लागि डकेट र ओली पोपले ९९ रनको साझेदारी गरेका थिए । पोप ६५ बलमा ६ चौकासहित ४५ रनमा साउथीकै बलमा टम लाथमबाट क्याच आउट भए । जो रुट १४ र बेन स्टोक्स १९ रनमा आउट भए ।

छैटौं विकेटका लागि ह्यारी ब्रुक र बेन फोक्सले ८९ रनको साझेदारी गरेका थिए । फोक्स ५६ बलमा ५ चौकासहित ३८ रनमा आउट भए । न्युजिल्यान्डका तीव्र गतिका बलर निल वाग्ररले सर्वाधिक चार विकेट लिए । कप्तान टिम साउथी र स्कट कुग्गेलिजनले दुई दुई विकेट लिए ।

न्युजिल्यान्ड पहिलो दिनको खेल सकिँदा १८ ओभरमा ३७–३ को अवस्थामा छ । डेभन कन्वे १७ र निल वाग्रर ४ रनमा अविजित छन् । केन विलियम्सन जेम्श एन्डरसनको बलमा ६ रनमा एलबीडब्लू आउट भए । टम लाथम एक र हेनरी निकोलस ४ रनमा आउट भए ।