काठमाडौं (हाम्रो खेलकुद) – घरेलु टोली नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत शुक्रबार स्कटल्यान्डसँग खेल्दैछ । खेल बिहान ९ बजे टियु क्रिकेट मैदानमा सुरुहुनेछ । दुबै टोली यस सिरिजमा लगातार दोस्रो जित हात पार्न चाहन्छन् ।

नेपालले नामिबियालाई दुई विकेटले पराजित गरेको थियो । नेपालले २ सय ८६ रनको लक्ष्य ८ विकेट गुमाउँदै पूरा गरेको थियो । नेपालले ओडिआईमा पूरा गरेको सर्वाधिक ठूलो योगफल थियो । नेपालको जितमा ओपनर कुशल भुर्तेलले १ सय १५ रनको शतकीय इनिङ र करण केसीले पाँच विकेट लिएका थिए ।

स्कटल्यान्डले नामिबियालाई १० विकेटले हराएको थियो । स्कटल्यान्डको जितमा जर्ज मुन्शेले ६१ बलमा १ सय ३ रनको सानदार शतकीय इनिङ खेलेका थिए । नेपालले आफ्नो क्रिकेट इतिहासमा स्कटल्यान्डलाई एक पटक मात्रै पराजित गरेको छ । गत जुलाईमा नेपालले स्कटल्यान्डलाई उसकै भूमिका पाँच विकेटले हराएको थियो ।

स्कटल्यान्ड आइसिसी विश्वकप लिग–२ को च्याम्पियन टोली हो । नेपाल शीर्ष पाँचमा पर्दै ओडिआई मान्यता जोगाउन संघर्ष गर्दै आएको छ । नेपालले ओडिआई मान्यता जोगाउन बाँकी ११ मध्य ८ खेल जित्नुपर्ने हुन्छ ।

तर एसोसियट क्रिकेटको सर्वाधिक बलियो टोली स्कटल्यान्डलाई हराउन सहज भने हुनेछैन । नेपालले आफ्नो उत्कृष्ट क्रिकेट खेल्नुपर्ने हुन्छ । नेपालले स्कटल्यान्डलाई हराउन यी पाँच कमजोरीमा सुधार गर्नुपर्ने हुन्छ।

५.राम्रो सुरुवात र अन्त्य

कुनैपनि टोलीको सुरुवात र अन्त्यले योगफल भरपर्छ । सामान्य योगफलमा स्कटल्यान्डलाई हराउन सकिँदैन । त्यसैले विशाल अथवा बलियो योगफल तयार पार्नुपर्छ । त्यसको लागि नेपालले सुरुवात राम्रो गर्नुपर्छ । पहिलो खेलमा ओपनर कुशल भुर्तेलले राम्रो ब्याटिङ गर्दै शतक हानेका थिए । आसिफ शेख शून्यमै बोल्ड भएका थिए ।

ज्ञानेन्द्र मल्ल २५ रनमा आउट भएका थिए । शीर्ष तीन ब्याटरले राम्रो सुरुवात दिलाउनु पर्छ । त्यसपछि आउने ब्याटरले थप खुलेर रन बनाउन सक्ने वातावरण तयार पार्नुपर्छ । मध्यक्रममा ब्याटर दीपेन्द्रसिंह ऐरी ७ रनमा आउट भएका थिए ।

ऐरीबाट नेपाल राम्रो प्रदर्शन चाहन्छ । दीपेन्द्रको ओडिआई प्रत्येक खेल औसत १६.८० छ । नामिबिया नेपाल राम्रो अन्त्य गर्न चुकेको थियो । नेपालले अन्तिम १० ओभरमा आक्रामक रुपमा ब्याटिङ गर्दै राम्रो योगफलमा पुग्नुपर्ने हुन्छ।

४. अर्थोड्रक्स स्पिनरको राम्रो सामना

पछिल्लो समय बायाँ हाते अर्थोड्रक्स स्पिनर नेपालका ब्याटरलाई घातक बन्दै आएका छन् । गतवर्ष टि२० विश्वकप छनोटको सेमिफाइनलमा युएईका अहमद राजा, केहि महिनाअघि ओडिआई सिरिजमा अयान खान, लिग-२ मा स्कटल्यान्डका मार्क वाट, ताहिर हम्जा, नामिबियाका बेनार्ड शोल्ट्ज र ओमानका जिशान मकसुद नेपालमाथि हाबी बन्दै आएका छन् ।

स्वलो बायाँ हाते अर्थोड्रक्स स्पिनर नेपाली ब्याटरले खुलेर खेल्न सकेका छैनन् । तर स्कटल्यान्डलाई हराउन नेपालले दुई अर्थोड्रक्स स्पिनर मार्क वाट र ताहिर हम्जाविरुद्ध राम्रो ब्याटिङ गर्नुपर्ने हुन्छ । गत जुलाईमा नेपाललाई १ सय २८ रनमा अल आउट गर्न मार्क वाटले तीन र ताहिर हम्जाले चार विकेट लिएका थिए ।

गत डिसेम्बरमा नेपाललाई १ सय ३७ रनमा अल आउट गर्न वाटले ८.१ ओभरमा १९ रन खर्चेर २ विकेट लिएका थिए । मध्यक्रममा २० ओभर यी दुई स्पिनरले गर्नेछन् । कमजोर बलमा जोखिम उठाउन सक्नुपर्छ । नेपालसँग बायाँ हाते ब्याटरमा कुशल मल्ल र गुलशन झा छन् ।

पहिलो खेलमा गुलशन झा खेलेका थिएनन् । बायाँ हाते ब्याटरले नै बायाँ हाते बलरसँग राम्रो प्रदर्शन गर्न सक्छन् । यदि नेपालले स्कटल्यान्डलाई हराउने हो भने यी दुई स्पिनरविरुद्ध राम्रो प्रदर्शन गर्न आवश्यक देखिन्छ ।

३. राम्रो ब्याटिङ

स्कटल्यान्डविरुद्ध नेपालले हारेका तीन खेल नै खराब ब्याटिङ प्रमुख कारण हुन् । स्कटल्यान्डविरुद्ध हालसम्म पहिला ब्याटिङ गर्दा नेपाल क्रमशः १२८, १३७ र ११९ रनमा अल आउट भएको थियो । स्कटल्यान्डविरुद्ध नेपालले ओडिआईमा हालम्म १ सय ५० रन कटाउन सकेको छैन ।

स्कटल्यान्डलाई पाँच विकेटले हराउनेक्रममा नेपालले १ सय ४५ रनको लक्ष्य पूरा गरेको थियो । नेपालले पहिला ब्याटिङ गरेका सबै खेलमा हारेको हुँदा टस निर्णायक बन्नसक्छ । तर टस आफ्नो हातमा हुँदैन । पहिला ब्याटिङ गर्नु परेमा राम्रो ब्याटिङ गर्दै विशाल योगफल बनाउन सक्नुपर्छ। नामिबियाविरुद्धको उत्कृष्ट प्रदर्शनले नेपाली ब्याटरको मनोबल पनि उच्च छ । नेपाल स्कटल्यान्डविरुद्ध त्यस्तै प्रदर्शन चाहन्छ ।

२. तेस्रो तीव्र गतिको बलरको विकल्प

नामिबियाविरुद्ध नेपालले तीव्र गतिको बलरको रुपमा सोमपाल कामी र करण केसीलाई मैदान उतारेको थियो । यी दुई मध्य एकले खराब प्रदर्शन गर्दा नेपालसँग तेस्रो तीव्र गतिको बलर विकल्प थिएन । नामिबियाविरुद्ध सोमपाल कामीले ९ ओभरमा १ मेडनसहित ५६ रन खर्चेर १ विकेट लिएका थिए ।

करण केसीले १० ओभरमा १ मेडनसहित ६१ रन खर्चेर ५ विकेट लिएका थिए । स्कटल्यान्डसँग जर्ज मुन्शे, काइल कोट्जर, रिची बेरिंग्टन र म्याथु क्रस जस्ता एसोसिएट क्रिकेटका स्टार ब्याटर टोलीमा छन् । यी चार ब्याटरसँग राम्रो अनुभव पनि छ । एक खेलाडी क्रिजमा टिक्दा पनि घातक बन्न सक्छन् । तल्लोक्रममा ब्रेन्डन म्याकुमलेन, क्रिस ग्रेभ्स र माइकल लिस्क पनि राम्रो ब्याटिङका लागि चिनिन्छन् ।

नेपालले तेस्रो तीव्र गतिको विकल्प खोज्न आवश्वक छ । टोलीमा गुलशन झा तेस्रो तीव्र गतिका बलरको रुपमा छन् । नेपालसँग सन्दीप लामिछाने र ललितनारायण राजवंशी प्रमुख स्पिनर हुन् । कुशल मल्ल र दीपेन्द्रसिंह ऐरी पार्टटाइम स्पिनर हुन् । त्यसैले नेपालले एक स्पिनरको स्थानमा तीव्र गतिका बलर टोलीमा थप्न सक्छ । नेपालले स्कटल्यान्डलाई हराउँदा सोमपाल कामी र आदिल आलमले तीन तीन तथा करण केसीले एक लिएका थिए ।

१.फिल्डिङमा सुधार

नामिबियाविरुद्ध नेपालको फिल्डिङ भने कमजोर थियो । नेपालविरुद्ध शतक प्रहार गरेका माइकल भान लिंगेलनको नेपालले दुई महत्वपूर्ण क्याच ड्रप गरेको थियो । त्यहीँ जीवनदानको फाइदा उठाउँदै विशाल योगफल तयार पारेको थियो ।

क्रिकेटमा एक विकेटले पुरै खेल मोडिनसक्छ । क्रिकेटमा जितको लागि ब्याटिङ, बलिङ, फिल्डिङदेखि सबै कुरा मिल्नुपर्ने हुन्छ । एउटा क्याच ड्रप हुँदा विपक्षी ब्याटरको मनोबल झनै बढ्न जान्छ । प्रमुख ब्याटरबाट गल्ती एक पटक मात्रै हुन्छ । त्यो गल्तीको फाइदा उठाउन नसक्दा भने ठूलो भारी पर्न सक्छ ।

क्याच छोड्न पुग्दा बलर र टोलीकै समग्र मनोबल घट्न जान्छ । एउटा क्याच वा रन आउटले पुरै खेल मोडिन सक्छ । त्यसैले नेपालले स्कटल्यान्डविरुद्ध उत्कृष्ट फिल्डिङ गर्न आवश्यक देखिन्छ ।