एजेन्सी – टेस्ट टोली अफगानिस्तानले पहिलो टि२० आई खेलमा घरेलु टोली युएईलाई पाँच विकेटले पराजित गरेको छ । योसँगै तीन टि२० आई खेलको सिरिजमा १-० को अग्रता लिएको छ।

जितको लागि १ सय ४३ रनको विजयी लक्ष्य पछ्याएको अफगानिस्तानले १९.१ ओभरमा ५ विकेट गुमाउँदै पूरा गर्यो । अफगानिस्तानको जितमा करिम जन्नतले ३८ बलमा २ चौका र ३ छक्कासहित सर्वाधिक ५३ रनको योगदान दिए ।

विकेटकिपर अश्फार जजाईले ४० बलमा ४ चौका र २ छक्कासहित ४८ र रहमानउल्लाह गुरबाज १० रनमा आउट भए । युएईका जुनैद्द सिद्धिकले ४ ओभरमा ३० रन खर्चेर २ विकेट लिए । जहुर खान,मोहम्मद जवादुल्लाह र जवार फरिदले एक एक विकेट लिए ।

त्यसअघि शेख जायद स्टेडियम आबुधाबीमा टस हारेर पहिला ब्याटिङको निम्तो पाएको युएईले निर्धारित २० ओभरमा ५ विकेट गुमाउँदै १ सय ४२ रन बनाएको थियो । युएईका कप्तान सिपी रिजवानले ४१ बलमा २ चौका र २ छक्कासहित सर्वाधिक ४८ रन बनाए । मोहम्मद वासिम ३५ बलमा ३ चौका र १ छक्कासहित ३३, वृत्य अरविन्द १७, रोहन मुस्तफा २२ र अयान खानले १८ रनको योगदान दिए ।

अफगानिस्तानका कप्तान राशिद खानले ४ ओभरमा ३४ रन खर्चेर २ विकेट लिए । आजमतुल्लाह ओमरजाईको नाममा एक विकेट रह्यो । दोस्रो खेल शनिबार र तेस्रो खेल आइतबार हुनेछ ।