काठमाडौं(हाम्रो खेलकुद) – स्कटल्यान्डले आइसिसी विश्वकप लिग २ त्रिकोणात्मक ओडिआई सिरिजमा घरेलु टोली नेपालविरुद्ध शतकधारी जर्ज मुन्शेसहित प्रमुख तीन खेलाडीलाई बेन्चमा राखेको छ । टियु क्रिकेट मैदानमा भएको टसमा नेपालका कप्तान रोहित पौडेलले टस जितेर पहिला फिल्डिङ गर्ने निर्णय लिएको छ ।

स्कटल्यान्डले टोलीमा तीन परिवर्तन गरेको छ । स्कटल्यान्डले नामिबियाविरुद्ध ६१ बलमा १२ चौका र ७ छक्कासहित १ सय ३ रनको सानदार शतकीय इनिङ खेलेका जर्ज मुन्शेसहित प्रमुख तीन खेलाडीलाई नै बेन्चमा राखेको छ । मुन्शे, काइल कोट्जर र तीव्र गतिका बलर शफ्यान शरिफ बेन्चमा छन् । यी तीन खेलाडी स्कटल्यान्डका प्रमुख हतियार हुन् । नामिबियालाई १० विकेटले हराउन मुन्शेले १ सय ३ र काइल कोट्जरले ४६ रन जोडेका थिए । शफ्यान शरिफले तीन विकेट लिएका थिए ।

प्रमुख ओपनर बेन्चमा राख्दा दुई खेलाडीलाई डेब्यू दिएको छ । ज्याक जर्विस र टम म्याकिन्टोसलाई डेब्यू दिएको छ । स्कटल्यान्ड तीन खेल अगाडिनै च्याम्पियन बन्दै यसै वर्ष हुने ग्लोबल छनोटमा सोझैं छनोट भएको छ । स्कटल्यान्ड ३३ खेलमा २३ मा जित र ८ मा हारसहित ४८ अंकका साथ शीर्ष स्थानमा छ । उपाधि जितेपछि नयाँ खेलाडीलाई स्कटल्यान्डले मौका दिएको छ । स्कटल्यान्डले लिग २ मा अव तीन खेल खेल्न बाँकी छ । दुई खेल नेपाल र एक नामिबियासँग छ ।

नेपालले नामिबियाको खेलबाट ललितनारायण राजवंशीलाई बेन्चमा राख्दा गुलशन झालाई आजको खेलमा मैदान उतारेको छ । टोलीमा अन्य कुनै परिवर्तन छैन् ।

नेपालको प्लेइङ ११ :

आसिफ शेख, कुशल भुर्तेल, ज्ञानेन्द्र मल्ल, रोहित पौडेल (कप्तान), सन्दीप जोरा, दीपेन्द्रसिंह ऐरी, कुशल मल्ल, सोमपाल कामी, गुलशन झा, करण केसी र सन्दीप लामिछाने ।

स्कटल्यान्डको प्लेइङ ११ :

रिची बेरिंगटन (कप्तान), म्याट क्रस, क्रिस ग्रेभ्ब्स, ज्याक जार्विस, माइकल लिस्क, टम म्याकिन्टोस, क्रिस म्याकब्राइड, ब्रेन्डन म्याकुलम, क्रिस सोले, हम्जा ताहिर, मार्क वाट ।